Migrant tebilemtsü tekaraba mapang nung bentettsüla: Cerar

United Nations, September 26 (Agencies): Europe-i tang ajurua aliba migrant tebilemtsü khuret tekaraba mapang nung bentettsü nungdaka akümba olen ka Slovenia Ato Kilonser, Miro Cerar-i yashi Hokolbar nü metetdaktsüogo.
“Ozü Slovenia densema tanüngba Europe nung tentetba linük ajungai tang ajurushia aliba migrant tebilemtsü khuret ya yimya tajungtiba nung bentettsü merangdagi,” ta yashi nungi tenzüka New York yimti nung amenba United Nations Development Summit nung o jembidang Cerar-i iba olen ya metetdaktsü.
Ajisüaka, tang adoka aliba migrant tebilemtsü khuret ya Europe kija masü saka alima ajunga indang arok khuret lir ta shia, iba khuret bentettsü atema tera bushia aotsüla ta pai ajungshia ashi.
“Tang ajurushia aliba migrant nisungtem den sentakba khuret ya bentettsü asoshi külemi amalitepa inyaktsü nungdaker. Ano, iba maparen inyakdang ozüng alema jenoka alitsü meranger aser ozüng alema nisung shibelenba maparena nokdangtsüsa tali kümdangshia inyaktsüla,” ta pai shisem.
Ano külen, par linük telungi migrant nisungtem maitdaktsütsü nükjidong nung Croatia-i Serbia den arrtsü hopta ka shi shibanga ayuba sülen kasaji yashi tanaben lapoktsüba osanga bushitetogo.
Croatia-i par arrtsü shibanga ayuba ajanga kidangsüa aliba Serbia linük den mangatettep adoktsü tenzükba osanga jangjaogo.
Middle East aser Africa na nung tongpang kanga sashia raraba ajanga bener arutsüba timtem toushi balala nungi pei taküm jenboa alitsü nükjidong nung refugee nisung 60,000 dak temai Serbia ajanga Croatia linüki hopta ka tsüngda nung aiba osang bushiteta lir.
“Pei linük toksür Europe nung jenoka alitsü merangba migrant nisungtem den sentakba khuret ya alima ajunga indang arok khuret lir,” ta shia, Europe ajungai ka küma lungjemba ajanga dang iba khuret ya mangatettep kecha madoki bentettettsü ta European Union Commissioner, Johannes Hahn-ia metetdaktsüogo.
Ano, Europe lenirtemia par tangatetba melenshia parnok rong nung tangatettep lia tang ajurushia aliba migrant khuret aroki lungjemer bentettsü tenzükba olen ka European Union (EU) Tir, Donald Tusk-ia tanü metetdaktsü.