Mike Bryan o Jack Sock nati US Open kokogo saka tarutsü mejangja

Rongjui/September 8, 2018 (Agencies): Mike Bryan-i tebur tem rongnung tarep asaya nung Grand Slam doubles title timba kokteta lir aser pai pa indang partner taruba küm shimtettsü.
Pa jakrep Bob den tanaben asayatsü akok shiba tetsüng yiruba ajanga masayai lir, mesera pai Jack Sock den maneni asayatettsü.
“Bob temang anema kümra ni pa den asayaner,” ta Mike-i ashi.
Ajisüaka Sock den külemi Grand Slam doubles title ana atonga akokba ajanga pa bilemdangtsüsa kümogo.
Tenati Rogonü Lukasz Kubot aser Marcelo Melo na 6-3, 6-1 agi koka U.S. Open benogo.
Iba takok dena Mike Bryan-i Grand Slam doubles title 18buba koktetogo. Item takoktem rongnung trokbo U.S. Open akokba lir.
Mezüngbuba title 16 Bob den külemi akok saka pa temang majungba ajanga pai Sock den tongtepa liasü, shiba tarep asaya toktsür kija asaya nung temulung agüja asayatsü asoshi bilema liasü.
Iba dak sendakba nung Sock-i ashiba agi, “tena ya iba asaya nung tarep asayar tajungtiba lir aser court külen külemi tena rongnung ka den asayatsüji jangratemtsüka ama bilem, kechiyong taoba mapang nung ni tena den asayaogo. Tang asayamung ana tashi koktetba ya kanga jangratemtsüka lir.”
Mike aser Bob nati 2012-13 tsüngda asayamung pezü atonga akokba sülen Bryan aser Sock na ya Grand Slam tebur tarep asaya ana atonga akoker mezüngbuba tarep kümogo. Bjorkman aser Todd Woodbridge nati 2003 küm Wimbledon aser U.S. Open atonga akokba sülen tenati tang iba jenjang ajangtetogo.