Mike Tyson-i Chicken Biryani kanga sapua achir

Mongputeni/October 3, 2018 (Agencies): Taoba America nunger boxing heavyweight champion Mike Tyson-i chicken biryani kanga sapua achiba den traditional sherwani ka bener aoba celebrity bodyguard Shera-i lemsatepa liasü.
Tyson, mixed martial arts league, Kumite 1 League lapoktsütsü asoshi aruba mapang security achaayangtsü asoshi Shera aser Tiger Security Services mekaa liasü.
Shera, shiba Bollywood nung nüngtugu actor Salman Khan anükba ajanga ajaki jangja aküm pai ashiba agi, “Tyson ya kanga dang tongmelang aser straightforward nisung ka lir. Pa küm tem tsüngda tesüngjemba kümogo saka ni pa dak nübur atsüa arutsü tanüla keta aliba kanga nükshir. Pai India nunger sobaliba, chiyongtsü aser hospitality sapur amai reprangtetogo. Pai techinüba chiyongtsüji chicken biryani lir aser sherwani ka dena kidangi bener ogo.”
Tyson-i Mumbai aser Agra semdanga liasü.
“Pai Dharavi aser Taj Mahal semdangogo saka raliwalirtemi jangraa inyakba maparen kecha minyak. Ni pa sülen anidaka liasü asünung fan tem aikati Salman Khan aser Mike Tyson na league atema ring nung külemi shilem agitsü imlaa kü dangi ken o ashishia aru. Salman Khan den khen inyakerbo tanga celebrity tem anishitsü yabo tezüba,” ta Shera-i ashi.