Mike Tyson ‘Kickboxer: Retaliation’ film nung shilem agitsü

Los Angeles  May 27, 2016 : Alima ajaki meteta alisang, tsüngteper tejen Mike Tyson-a film tasen “Kickboxer: Retaliation” nung shilem agitsü. Iba film ya taoba mapang yanglur aliba “Kickboxer: Vengeance” film indang tanabuba shilem alitsü.
“Kickboxer: Retaliation” film ya tang California aser Nevada nung produce südar aser iba sülen June ita nung Thailand nung oa tatembang principal photography agitsü, ta variety.com osang ajanga ashi.
Iba film nung Tyson-i ozüng alema benshiba ajanga tepuokdak ayur shilem agitsü aser pa merang agi atsübanger aliba telung nung raraba angutsü.
“Ibai onok asoshi menungra bilemtetba mapang ka mesüka lir. Onoki UFC nung shilem agir timba sür, nüngtugu zükteper parnok champion 14 tashi iba film nung shilem agidaktsütsü sign sütepogo aser parnok ajak liaka Mike Tyson-a densemba ajanga film tali akhüm ketdaktsütsü,” ta producer Robert Hickman-i ashi.
Taoba mapang “Kickboxer: Vengeance” film John Stockwell-i direct asü aser iba film nung Alain Moussi, Jean-Claude Van Damme, Dave Bautista, Gina Carano, Georges St-Pierre aser Darren Shahlavi nungeri shilem agia lir.
Iba film ya 1989 küm yangluba film “Kickboxer” yanglushiba lir.
“Kickboxer: Vengeance” film ya taküm September ita nung sayatsü sendong lir.