MIL aser Skill Education topper nem sempet agütsütsü: PB Acharya

Kohima, May 26 (TYO): Pei tetsü otsü azüngtsü aser skill development jangradaktsütsü atema Nagaland Angh, PB Acharya-i taruba academic session, 2018 nungi Modern Indian Languages (MIL) aser Skill Education subject tem nung tematiba jenjang angur nem sempet agütsütsü ta metetdaktsü.
Nagaland Board of School Education (NBSE)-i High School Leaving Certificate Exam (Class X) aser Higher Secondary School Leaving Certificate Examination (Class XII) 2017 nung tematiba jenjang nung takok angurtem nem sempet agütsüba sentong nung Angh Acharya-i iba osang metetdaktsü.
Paisa, HSLC aser HSSLC 2017 kübok Arts, Science o Commerce streams nung tematiba jenjang angurtem nem senpettem lema agütsü.
Directorate of School Education kübok State Institute of Naga languages tentettsü aser taruba academic session nungi class V nungi VIII tashi nung Alternative English agientsü aser iba melena tetsü oshi ang azüngtsü atema state sorkari telemtetbatem agiogo, ta Angh-isa metetdaktsü.
Kaket shisatsü bushibaren nung tesayubatem angazükba dang masü saka kaketshirtem dak aliba sempettem ajungkettsü atema sabang agütsütsüla. Talisa, kaketshirtemi pei tetsü oshi jungjunga angazüktsüla kechiyong iba jagi pei maitsü kümzüka ayutsü. Anungji, tetsü oshiji züngzünga aser temulung agüja sayutsüla, ta Acharya-isa shisem.
Paisa, nija rejutemi takok tajungba anguba atema tenüngsang agütsü aser nija rejutemi sen angutsü atema dang masü saka kaketshirtem tajungba nung anitettsü atema temulung agüja inyaktsüla, ta ayongzük.
School Education & SCERT Minister, Yitachu-ia o jembidang, “Nagaland nung kaketshirtem aikati Class-III nungi Class-XII tsüngda züngtor anener, anungji tsüraburtem, tesayurtem aser kaketshir tajungtemi, tangar memenepba kaketshirtem ajungkettsüla” ta ayongzük.
“Kaketshirtemi tematiba jenjang nung takok angubaji kanga dang tajung saka iba ya tatembang masü, saka tetenzüker ang lir ta angatettsüla. Nenok alizüng atongtsü atema timtem aremtsüla” ta School Education & SCERT Principal Secretary, F P Solo-ia kaketshirtem ayongzük.
Külen, NBSE Chairperson Asano Sekhose-ia tematiba jenjang nung takok angurtem dang, “mark aser grade anguba dak alia, shisaliokji angazükba indang lir. Nenok takok angur ka asütsü atema, tangar yaritsüla aser parnok peladaktsütsüla. Tanü nenoki takok anguba ajanga tanga kaketshirtem nem osang sangoktsür aser nenoki züngyonga aodang, maneni tangar ajungmesotsü liang” ta ashi.
Sentong nung UBC Kohima Pastor, Rev Dr Rachülie Vihienuo-i tenüngsang agüja sarasadem aser Ministers’ Hill Baptist Higher Secondary School o Neingusalie Yano, HSLC 2017 Music Topper nungeri ken ajanga shilem agi.