Mim agütsüba maparen nung aibelena mali : Russia

Moscow, Metsüremi 13 (Agencies) : Taoba nung telok ana tsütsü inyaka liasüba itdangiter (double agent) Britain lima nung lia mim amshia tepsettsü merangba maparen nung parnokibo kecha shilem agia mali, ta tanü Sangtennü Moscow-ibo nangzüka shiogo.
Pa tespsettsü atema koma/koda Russia nungeri yangluba ‘nerve agent’ amshi, iba indangji telangzüba agüjang ta taonung tashi mapang züngzükja lir.
Iba maparen nung Russia nungeribo aibelena mali, ta Foreign Minister, Sergei Lavrov-i metetdaktsü.
Tan taoba March 04 nü Britain yimti ka nung lia Sergei Skripal aser par jala na dak iba tim masüba maparen inyak.
Iba dak sendakba nung United States, NATO aser European Union amala telongjemi Britain nungertem nungiter.
Iba maparen nung amalitepa inyaktsü asoshi Russia nunger renema dang lir saka ‘nerve agent samples’ reprangdangtsü atema parnoki mepishibajibo Britain-i magizüker, ta Lavrov-i metetdaktsü.
Tatar senden alidang British Prime Minister, Theresa May-i ashiba agi mim agütsübaji Russia nungeri inyak ta kanga temulung malem bilemer anungji parnok nem telangzüba agütsütsü asoshi taonung ayatrem tashi dang Moscow nem mapang agüja lir.
Alima rara tanabuba tembangba sülenbo Europe nung ‘nerve agent’ amshibaji tan ya mezüngbuba asütsü, ta Foreign Secretary Boris Johnson-i metetdaktsü.
Arishi küm 66 tain Skripal aser par jala Yulia (Küm 33) naji tang kanga mejungi kümer mozü kidang anepaludar. Tebu o jala naji Salisbury yimti nung shopping centre ka kimalen menden ka nung süchia oor lia angu.