Minister anenba sülen Pakistan nung longkak aitba anener

Islamabad, November 27 (Agencies): Pakistan Law Minister Zahid Hamid mapa toktsüba sülen linük ajunga nung Pakistan Islamist temi jazüka longkak aitba anenogo. Hopta tsüngta longkak aitba mapang Pakistani Islamist aser police tsüngta rara adoka liasü, saka tang parnok longkak aitba tesem toktsür aoba mapang lir, ta Islamabad aser yimti balala nungi osang agütsü.
Tamangba yimsü mezüngmeshiba ajanga Hamid ya anentsüla, ta takhangba agüja Pakistani Islamist temi Pakistan yimtiba indang tongtibang lenmangtem hopta aika mokdanga aru. Aser pai tatok nangzük.
Honibarnü longkak aitertem aser police tsüngta raraba mapang nisung trok taküm samaogo aser nisung 200 jungnüa yiru, ta osang ajanga ashir.
Civilian sorkari iba ama teraksa tia nung mapa shidak magie atsüngzükba ajanga Pakistan yimden nung maneni mitkartemi yimsü asütsü südi, ta tasüngdangba arur.
“Chief of army staff-i takhangba ataloktsütsü nangzükba sülen longkak aitba anener,” ta iba takhangba agütsür lenir Khadim Hussain Rizvi-i Tehreek-i-Labaik Ya Rasool Allah Party nungi longkak aiter meyerijang aika Islamabad nung adenshia alidak Homparnü ashi.
Electoral tezüngzüktep tasenba küma yanglushiba nung Prophet Muhammad indang olen kar maliba ajanga law minister-i tamangba yimsü mezüngmeshi, ta longkak aitertemi aitsü. Ibai clerk temi aibelenba liasü, ta minister-i ashi.
Hamid anema longkak aitba ya hopta aika lia arua Islamabad nungi tanga yimti temi asemshia Lahore, Peshawar aser Karachi tonga ao.
Honibarnü rara adokba mapang sorkari nija indang news channel aser social media network tem shibangtsü.
“Menden nungi alutsü telemtetba agiba ya tensa tamajung nungi linük kümzüktsü mechi lir,” ta Hamid-i osangkaket ka nung shia lir.
Iba ajanga longkak aiter temi minister nem fatwa magütsütsü melung.
Islamist temi akhangba ama longkak aitertem pua aliba chioktsü aser longkak aitba mapang senotsü indokba menoktsü asoshi sorkari melung.
Iba mangatettep ajanga linük nung takoksa tulu ajurutsü liasü, saka mitkartemi tiyongi ia tangatettep kati arudaktsüba asoshi mitkartem dang pelar, ta iba telok nung ketdangser ajanga shisem.