Minister anentsüba ajanga tatishitsü ka sayuogo: Kejriwal

New Delhi, October 11 (Agencies): Ochimashi onük nung Anti-Corruption Branch (ACB) atema Centre sorkar aser Delhi sorkar na tsüngda rara tenzüker aliba mapang ka nung AAP tongti lenir aser Delhi chief minister, Arvind Kejriwal-i, Ato kilonser Narendra Modi’er sorkari ochimashi anema meinyaker ta aitsüba den külemi tangbo Prime Ministers’ Office-i ACB azüoker, ta aitsüogo.
Kejriwal-i par minister Asim Ahmed Khan anema ochimashi kuli anguba sülen ghonda 24 tsüngda minister menden nungi anenja liasü, aser iba dak sentakba nung pai, record nung mangaoka aliba kuli ajanga pa kanga aoksa, ta ashi.
“Ozü minister temi yamai minyaktsü ta ni tamang kaa liasü. ACB ya onoki mazüoktettsüsa akümba sülen onok ketdangsüba nung tashimait kümogo. Ochimashi ken o nung Khan densema aliba ya ni atema taoksatsü osang ka liasü. Mezüng bushisüngdang nung kuliji kanga majung, iba yongji ni iba telemtetba agitsüsa akum. Iba onük nung ni ola madok nungbo iba jagi kü shisatsü tepseter ama süla. Anungji pa anentsütsü atema ni telemtetba agi,” ta pai ashi.
“Tangbo ACB ya Modi-i azüoker. Mezüng ozü sorkar anogo 49 nung nüburtemi ochimashi anenogo ta bilemba ajanga nüburtemi ano tanaben onok shim. Onok tanaben tashii aruba sülen mezüng ita ana-asem nung ochimashi anema noktak aser temerenshi agütsü. Item ajakji ajanga ochimashi ajema akum. June 8 nü parnoki (Centre) onok dang nungi ACB rakzük. Ibaji ajanga onoki ochimashi anema raraba nung tetsüktaktsü aluogo,” ta chief minister-i ashi.
Paisa, tamasabo iba ya khen atema dang asütsü aser onok nem ACB tanaben meyipa agütsütsü ta bilem, ajisüaka yamaji matalok, ta ashi.
“Joko mapang agitsüsa akumtsü, kechiyong iba onük ya tang okatak lir,” ta paisa ashi.
October 9, 2015 nü Kejriwal-i ochimashiba ken o dak sentakba nung Delhi sorkar nung Food & Civil Supply Minister, Asim Ahmed Khan minister menden nungi anendakja liasü.
Osangbenertem den jembidang pai, “Onok dangi ken o ka arua liasü, aser ibaji reprangshiba sülen Asim Ahmed Cabinet nungi agientsü atema onoki lemtet. Ken o agütsüsang jagi ghonda ka indang audio record ka agütsü, Manish Sisodia (Deputy chief minister) künati iba audio clip ji angadanga asadang, aser ibaji süoki ia agitsüla ta bushitet,” ta metetdakja liasü.
Ano külen Kejriwal-i Centre nung BJP sorkar aija, BJP-ia Madhya Pradesh aser Rajasthan nung ochimashi ken o alir minister tem parnok menden nungi anentsütsüla, ta shiogo.