Minister aser VC ajanga Dalit kaketshir soseta asü: Rahul

New Delhi, January 19 (Agencies): Deobar nü Hyderabad University nung Dalit nunger shisashir ka soseta asüba ken o nung tanü Congress tatong Tir, Rahul Gandhi-i HRD Minister Smriti Irani aser Labour Minister Bandaru Dattatreya na aija, Minister tem aser Vice Chancellor nungeri tim teinyaktsü meinyakba ajanga pa soseta asü, ta ashi.
Tanep Rahul University campus-i oa lungkak aiter kaketshirtem den jembia liasü.
Gandhi-i, University jagi tim agi ibaji latettsü merangtsü melena parnoki kaketshirtem nem temeten magütsü, ta aitsü.
“Vice Chancellor aser Delhi nung Minister-i tim teinyaktsü meinyak. Ibaji ajanga kechi atalok. Ibaji ajanga linük tajungba akumtsü, angazüktsü aser tajung akumtsü atema yagi arur lanur kati kanga tejashi nung pa sasa tepsettsüsa akum,” ta Rahul-i ashi.
“Atangji pai soseta asü, saka pa soseta asütsüsa akumbaji Vice Chancellor, minister aser University ajanga lir,” ta pai lungkak aiter kaketshirtem dang ashi.
Paisa Vice-Chancellor aser minister na nem temerenshi tulu agütsütsüla ta takhangba agütsüogo.
Tesülen Rahul-i twitter ajanga, “Tarutsü nungbo asenoki ozüng ka benoktsüla, koba ajanga India kaketshir ajak nem pei tebilemba sadoka jembitsü atema temeten agütsütsü,” ta ashi.
Gandhi-isa, “Kin kidong mesüra tamangba yimsü kecha mebendangi kaketshir ajaki University-i arutsü akok. Ni jembinüba aser tebilemba ajak jembitettsü ta kaketshirtemi bilemtsüla. University ya lanurtem arur pei tebilemba lemsateptettsü atema lir,” ta ashi.
Yaküm August ita nung ABVP nung inyaker kaketshir ka dak azük ta tai tongloktsüba dak sentakba nung University nungi Dalit nunger kaketshir pongu aritok aser parnok rongnung soseta asüsang Ph.D shisashir Rohith Vemula densema liasü.
Rohit soseta asüba ken o dak sentakba nung SC/ST Act kübok Union Labour Minister, Bandaru Dattatreya aser University Vice-Chancellor na anema ken o ka benokogo.