Minister Imna Along-i Tening semdang

Dimapur, Rongchii/April 09, 2020 (TYO): Higher Education, Technical Education & Tribal Affairs, Minister Temjen Imna Along aser Water Resource Department, Advisor Namri Nchang, shirnok Peren District nung COVID-19 nokdangba maparen aser tensa asadangtsü asoshi shima lir, April 09, 2020 nü tenati Tening semdanga liasü, ta sangdong ka ajanga metetdaktsü.
COVID-19 atema tekümdangtsü meratem agitsü asoshi Minister, Temjen Imna Along aser Advisor Namri Nchang nati sorkar ketdangsertem aser nüburtem dang tongmelang agi metetdakja liasü. Telok den jembiba sülen, tenati Tening kübok lapoka aliba mozüki aser office tem semdanga aser inyakyimtem reprangshima liasü.
Tening tesem sema senzüba mapang, Minister aser Advisor na den Deputy Commissioner, Sentiwapang Aier aser Chief Medical Officer, Peren naprongla dena liasü. Kasa mapang Tening nung alir nüburtem nem angati mask lema agütsü aser parnok den-a sensaksema liasü, ta kasa sangdong ajanga metetdaktsü.