Minister Jacob Zhimomi-i Dimapur nung senden ayonga amen

Dimapur, Monupii/May 07 (TYO): Coronavirus tashidak wara prokshiba den raratsü asoshi Dimapur district nung inyakyim balala asadangtsü asoshi PHE Minister, Jacob Zhimomi-i Dimapur district nungi legislator tem aser Dimapur district administration, Police, Medical Department Naga Council Dimapur, Western Sumi Hoho Dimapur, Chakhroma Public Organization, Food and Civil Supplies Department den senden ka May 7, 2020 nü Deputy Commissioner, Dimapur indang conference hall nung mena liasü.
Iba senden nung Minister Jacob-i, linük ajunga nung anempongba ozüng tang tashu lir, anungji ajak ajangzüktsü mechi nüburtemi menüngdakba nung jila/colony nung mesenzütsüla, ta ashi.
Nüngdakba osettsüset nung jenjang tali temlokba atema süoki ia jembiba mapang pai district administration aser Dimapur Municipal Council dang nüngdakba osettem nübur peridaktsütsü aser jenjang tali temlokba mittsü nenshia metetdaktsü. “Iba tensa dak ajemdaker shingaia tajangzük mebushitsüla,” ta pai ashi.
COVID cess atema NGO temi ashishiba jangjashitsüba mapang Jacob-i ashiba agi, state telungzük nung revenue kecha maka aser Central sorkar nungi GIA agütsüba nung dang metaloker alir, anungji iba ama tensa nung makamaiter yaritsü atema sorkari COVID cess ya benok.
GB aser village council temi district nung arrtsülen kanga junga anükba atema pai pelaba lemsatep aser paisa police aser district administration dang maneni arrtsü tesemtem shibangtsü ashi. Lokti tentet balala nungi amalitepa ketdangsertemi Dimapur district nung coronavirus den raratsü asoshi renemshiba nung temolung asüba paisa lemsatep.
Senden nung Advisor, Zhaleo Rio-i jembiba mapang, kuli aika nungi Dimapur ya lendong mela mela ajurutsüba district ka lir ta ajiteter, saka COVID-19 den raraba nung frontline workers, administration, police, NGOs aser civil society balalai meranga inyakba ngua kanga pelar, ta ashi.
Political party balala nungi süaka tenük agi manguba virus, COVID-19 den ajak lungjemer raradagi aser tatem tashi raratsü nüngdaker, ta Advisor Tovihoto-ia senden nung ashi.
Nüburtem angatetdaktsütsü aser osang sangdongtsü asoshi social media ya kanga tongtipang lir, saka osang taila agi nüburtem manisatsüla aser nisung ajaki social media mashi lenmang nung mamshitsüla, ta paisa ashi.
Iba tashidak wara den raraba mapang district administration aser police den lungjemer nokdakba asoshi MLA Moatoshi Longkumer-ia nüburtem den pelaba lemsatep.
Maneni iba senden nung Naga Council Dimapur aser Chakroma Public Organization nungi teshimtet nübutemia jembia liasü.