Minister Jacob Zhimomi-i Melahumi aser Shevishe semdang

Dimapur, Tsüklai/February 28, 2021 (TYO): Minister, PHED. Govt. of Nagaland Jacob Zhimomi den Peter Lichamo, Deputy Commissioner, Zunheboto, Kitoshe Sumi EE PHED aser Jal Jeevan Mission (JJM) amenoktsü atema maparen lemzükba Sorkar ketdangsürtemi Hokolbarnü (26.02.2021) Aghunato Sub-Division kübok Tokiye RD Block nung Melahumi aser Shevishe yimtsüng semdang, ta sangdong ka ajanga metetdaktsü.
JJM (Jal Jeevan Mission) ya India Ato Kilonser Narendra Modi’er Sorkar indang mapatong ka lir, koba ajanga 2024 tashi India kübok kilen shia nung Functional Household Tap Connection (FHTC) agütsütsü nükjidong lir.
Yimtsüng ana semdangba mapang Minister-i yimertem den sensaksem aser FHTC tajangzük angurtemi pa Dang pelaba metetdaktsü. Melahumi yimtsüng nung lokti telongjem sentong ka agiba mapang, Lizutomi aser Satami yimtsüng nungi nübur lennirtem aser GB temi Minister dang tajemtsü tzü temerük nüngdakba aser parnok tebilemba lemsatepa liasü.
Bobohu ayong nungi Zunheboto District HQ tashi tajemtsü tzü meser alutsü Department dang mulungsoa melaba asoshi Melahumi aser Lizutomi yimertem dang Minister-i pelaba metetdaktsü.
Minister-isa, Zunheboto Town Phase-2 nung water supply atema 150mm dia. Gravity mainline inoka aoba maparen aser Melahumi Village nung ‘water treatment plant” anaprongla semdanga liasü.
Kasa anogo, JJM kübok Har Ghar Jal maparen dak sendakba nung Zhimomi-i pa indang department aser Zunheboto District indang Civil Administration den senden ka amen aser ketdangsürtem dang pei nem nüngloktsüba maparen junga achaayanga inyaktsü ajungshiogo.