Minister Kaito-i o meyipa agitsüla: NFHRCC

Dimapur, March 12, 2025 (TYO): Nagaland Foothills Road Coordination Committee (NFHRCC)-i PWD Road & Bridges Minister G. Kaito dang tawa pai Assembly nung jembiba meyipa agitsü metetdaktsüogo.

NFHRCC-i contract mapa meshi, nüngdakba criteria matong aser registered contractors ajanga mapa agütsü ta Minister Kaito-i jembiba ajakji tiyazü aser pa ama yimsüsür tejen kati yamai jembiba ya tim masü ta parnoki ashi.

Pai ashiba ama masü saka NPWD, R&B-i ang NFHRCC dang qualified contractor firm ka nem contract works 4 lemzüktsütsü mepishi aser iba atema sub-committee ka tentet. Iba ludeni kulitem jangjatepba sülen department dangi October 28, 2024 nü endorsement letter yok ta NFHRCC-i ashi.

Iba mapatong atema contractors meshimdang May 8, 2024 nü committee-i Department nem contractor tem shimba dak sendakba onük 7 aliba Memorandum ka agütsü aser iba kasaji May 9, 2024 nü osangkakettem nunga sangdonga liasü ta NFHRCC-isa metetdaktsü.

NFHRCC-i department nem agütsüba memorandum nung qualified registered contractors shimba nung kanga kümdangtsü, Naga nunger lanur contractors nem maongka agütsütsü aser qualified contractors shia nem kilometer 10 nungi 15 tashi dang lemzüktsütsü shia liasü.

Parnokisa qualified contractor nem tesem ka dak tali mapa melemzüktsütsü aser prescribed SOR kübok mesüra 5% tashi dang mapa lemzüktsütsü metetdaktsü.

Mapa lemzükba timi aser mapang shitak nung inyaktsü atema Department, contractors aser NFHRCC tsüngda tripartite agreement ka nung sign süteptsü atema NFHRCC-isa department dang ashi.

Parnokisa division shia nung CE Testing Co.Ltd alignments sülen anidaktsü aser division shia nung actual technical DPR nung ajemdaker senotsü agütsütsü department dang ashi.

Item onük nung ajemdaker NFHRCC-i PWD, Road & Bridges Minister Kaito dang pai Assembly nung jembiba meyipa agitsü nenshia metetdaktsüogo.