Minister Metsübo-i Kohima nung teyangludak Super Market semdang

Mokokchung, Aami/June 7 (TYO): Yangtepnü Minister of Urban Development, Municipal affairs & Taxes, Metsübo Jamir-i tang Kohima nung teinyakdak Super Market mapa repranga jajaogo. Tanü iba mapa repranga jajadang pa den Advisor Rural Development & REPA, Dr. Neikiesalie Kire, Kohima Deputy Commissioner aser CEO KMC nungertem dena liasü.
Tanga district-tem asoshi tatishitsü asütsüsa maparen ajak kanga junga inyaktsü asoshi Minister Metsübo-i mita repranga jajaba mapang tenzükertem dang nenshia ashi. Super Market telungtet/temeket nung kilentzü kanga junga asadanga yanglutsü asoshi shisa lemsatepa liasü.
Minister-isa Kohima Municipal Office semdanga KMC office nung tenzükertem den senden ka mena liasü. Iba senden nung Kohima yimtiba nung terenlok mapa balala aser tebilemtsü ajurubatem indang lemsatepa liasü; tongtibangsa Traffic timtem, Parking timtem, lenmang, kilentzü, janaona anepaluyim, tasümang rungdokba tesem aser ano merükmejuba dak sendakba onük balala jembitep.
Anogo shia nüburtemi tebilemtsü balala ajurubatemji tajungbaleni benteta inyaka aoba den ano terenlok maparen balala inyakdang department balala den tongtepratepa inyaktsü asoshi paisa KMC pur ajungshia liasü.