Minister Metsubo-i Mokokchung nung senden ayonga amen

Minister, Rural Development aser Minister in-charge of COVID-19 Mokokchung, Metsubo Jamir-i District Task Force COVID-19 Mokokchung den senden amenba mapang tangokba noksa nung angur. (DPRO Mokokchung)

Dimapur, Aami/June 08 (Agencies): Minister, Rural Development aser Minister in-charge of COVID-19 Mokokchung, Metsubo Jamir-i District Task Force COVID-19 Mokokchung den senden ka June 8, 2020 nü mena liasü. Iba senden ya District Planning Hall nung Deputy Commissioner, Mokokchung, Limawapang Jamir mendenpuba sür mena liasü.
Iba tashidak wara den raraba mapang District Task Force den yaritepba atema Deputy Commissioner-i lokti tentet balala aser nüburtem dang pelaba lemsatep aser ano maneni Mokokchung nung aliba nüburtem atema Aoer Legislator ti-i TrueNat COVID-19 testing machine tenlaba asoshia pelaba lemsatep.
Maneni paisa District Task Force for COVID-19 aser NGO tem, talisa Ao Senden aser ABAM ajanga anibelem mesasai iba tashidak wara anema raraba mapang lenmang balala nung yaritepba aoshi pelaba metetdaktsü.
Tang tashi Mokokchung district Green Zone nung aliba ya nüburtem asoshi tia taka, ta Minister Metsubo Jamir-i ashi. Paisa bendanglen nungi arua tang Quarantine Centre tem nung alirtem danga ketdangsertemi totuyuba agütsüba sülen tashi anga anidaktsü ayongzük. Department of Rural Development ajanga achayangba agi district nung aliba yimtsüng ajunga nung Quarantine Centre lir, ta Minister Metsubo-i ashi.
Paisa Mokokchung jila aser temeket nung aliba medical sub-centre tem semdanga liasü.