Minister Nuklutoshi-i ‘Narendra Modi And Naga Peace Accord’ kaket sayatsütsü

Kohima, Dec. 10 (TYO): Dec. 13, 2015 nikongdang 1:30 ako nung Hotel Japfu, Kohima nung National Highways & Mechanical Engineering Minister Nagaland, Wb. Nuklutoshi-i Nagaland nung osangbener tain, Oken Jeet Sandham-i züluba kaket, “Narendra Modi And Naga Peace Accord” sayatsütsü.
Iba kaket nung tongtibangsa, Ato kilonser, Narendra Modi-i mera agia India sorkar aser NSCN(IM) na tsüngda tezüngzüktep agiba ajanga küm aika Naga yimtenren ken o bentettsü inyakba indang lir. Iba kaket nungsa Interlocutor, RN Ravi-i kasa onük nung ajak shilem agidaktsüba aser tesem nung lokti balalai pei tebilemba benokbatem indanga zülua lir.
Iba sentong nung kaket zülusang, Oken-i “Narendra Modi And Naga Peace Accord” kaket indang Okila ashitsü aser Kohima Press Club Tir, Xavier Rutsa-ia o tatsüka jembitsü.
Kaketzülur aser taoba mapang Kohima Press Club Secretary, Rita Krocha leniba nung iba sentong agitsü aser Rev. Dr L Tsanso, e-Evangelist (SEA)-i teyari meshia sarasademtsü.