Minister tejenpurtem portfolio memelenshitsü: Shürhozelie

Kohima, Feb. 23 (TYO) : Tang Nagaland nung chief minister den minister aser parliamentary secretary-tem tasenküma shimshiakasa, tejenpurtemi bena aliba mapabo memelenshii akhi abenba kasa portfolio abentsü saka tasen purtem nem dang anünga akaba mapatem lemzüktsütsü, ta tanü Brehostibar nü osangbenertem jembidang chief minister tasenba Dr.Shürhozeliei metetdaktsü.
Minister aser parliamentary secretary tasen purtem nem anogo ka ana tsüngda mapa lemzüktsütsü aser nüngdakra portfolio tasen kar enoksemtsü bilema lir ta paisa ashi.
Nagaland Legislative Assembly nung Speaker, Chotisuh Sazo anenadoker asünungji, pa melena shiba asütsü ta asüngdang dang, ‘onok ano mejembi saka onok ket nung nisung anasemka lir, anungji parnok rongnung tajungba ka shimtsü’ ta chief minister-isa ashi.
Tawa nübortem longkak aitba mapang, Naga nunger lanurtem taküm samaba asoshi Chief Minister-i tesasaba metetdaktsü.
Naga nungertem maparen aika nung kanga akoksaogo, anungji memenui state nung nüngdakba mapa ajak shitak inyaka aotsü atema nübortem rongnung tangatettep alitsü asoshi temulung kanga agüja inyaktsü ta paisa ashi.
Ano, tawa nübortemi government anema longkak aitba sentong nung shilem agir government tenzükertem dak kechi inyaktsü bilema lir ta asüngdang dang, ibaji mapangi ashitsü ta dang langzü.
Manipur election dak sendakba maparen indang metetnüa asüngdang dang, Manipur assembly election nung tokteptsü asoshi nisung 14 nem NPF ticket agütsüogo aser nüboyim sentong tenzükogo ta NPF tir aser chief minister, Shürhozeliei metetdaktsü.
Mapangi dang melara, taoba chief minister T.R.Zeliang tena külemi nüboyimtsüi aotsü ta paisa ashi.
ACAUT-i state government senpong nung sen crore 5000 dak tali lir ta metetdaktsüba indang asüngdang dang, government-i ibaji bushisüngdangtsü ta dang ashi.