Minister Temjen Imna Along-i CHC Jalukie semdang

Dimapur, Rongchii/April 09 (TYO): Minister, Higher & Technical Education & Tribal Affairs aser Minister incharge for Peren District on COVID-19, Temjen Imna Along aser Advisor, Water Resource Dept., Namri Nchang nati April 9, 2020 nü CHC Jalukie semdanga doctor aser nurse tem den senden ka mena COVID-19 tashidak wara den raratsü asoshi mera balala agiba aser nüngdakba osettsüset tem anguba indang asadanga liasü.
Medical staff, Peren district administration aser police tem den senden ka amenba mapang, district ketdangsertem den pelaba lemsatep aser Nagaland nung COVID-19 tashidak ka dang putetra ibaji khuret tulu akümtsü, anungji Tsüngremer tanükba bushitsüla, ta Ministar Along-i ayongzük.
Warashia nungi asenok jenbua mali, anungji ishika süaka kechi osettsüset/hadir angur, itemji tajungtiba nung amshitsüla, ta pai ayongzük.
Paisa medical staff tem dang alima ajunga ayimsünga aliba COVID-19 tashidak wara den raraba mapang district nung yimtsüngtem nungi tenzüka awareness shidak agütsütsü ajungshi aser parnok dang shiranger anepaluba mapang tali kümdangshitsü shia liasü.
Kasa senden nung Advisor Namri Nchang-ia CHC Jalukie nung medical staff aser CHC nung mapa balala inyaktsü asoshi lemzükja alirtem dang pelaba lemsatep.
Parnoki Isolation ward semdang aser Personal Protective Equipments (PPEs) agütsübatem asadanga liasü.
Iba senden nung Dr. Dennis Hangsing CMO Peren, Dr. Nukshisangla DIO aser Dr. Supongmenla Dy.CMO Peren nungertemi District nung COVID-19 nungi kümzüka alitsü asoshi inyaksangshiba aser sentong balala indang lemsatepa liasü.