Minister Temjen Imna Along-i tashishitsü o jembiba aitsür: GPRN

Dimapur, June 27 (TYO): Naga nunger atema kanga tongtibang mapang ka nung Naga linük maitsü dak sendakba nung NSCN-i Naga yimtenren lenir shinga tenüng teta mejembiner, kechiyong yimtenren balala süaka Naga nunger onük nung ajak longjemer inyakner, ta tanü GPRN MIP sangdong ka nung metetdaktsü.
“Ajisüaka nisung kari pei jenjang tim mesüi amshia Naga nunger putiotsü aser maitsü dak sendakba nung tashishitsü o jembira ibajibo süoki ia agir aser aitsütsü nüngdaker. Tawa Nagaland sorkar nung Higher & Technical Education Minister, Temjen Imna Along-i Naga nunger timtemba aser tenla agütsüba mebilemtsüi nüngdak makaba otem jembir. Temjen-i Naga nunger tarutsü yimtenren telemtetba agitsüsa tashi aliba nisung ka ama jembir, aser ibaji New Delhi nung par lenir peladaktsütsü atema lir. Tamalen-a pai Naga nungerji India nunger, ta jembiogo, ibaji ajanga aikati pa aitsüogo. Ano pai Naga nunger masüba nisungtema Nagaland Legislative Assembly nung züngsem akümtsüla, ta jembiogo,” ta kasa sangdong nung shia lir.
“Naga nunger yimtenren nung Temjen ama ka aliba ya tia maka. Iba ama nisungi Naga linük maitsü atema nokdaker Naga yimtenren lenirtem jenjang ilatsür. Naga nunger taginüba anema Temjen-i o aiben jembiba ajanga onoki pa aitsütsüsa akümer. Temjen-i inyakba ama joko tanga Naga Ministers/MLA temibo meinyaktsüla. Pei taginüba ataloktsü atema Naga nunger putiotsü meraksatsütsüla,” ta kasa sangdong nung shia lir.
“August 14, 1947 nü Naga nunger nüchiso sangdongba mapang nungi Naga nunger lenmang talangka jajaogo. 1954 küm nungi tenzüka India sorkari azütokshi tenzüka azü, asentzü aser nüktzü jenti laluogo. Mezüngbuba India-Naga Ceasefire of 1964 kecha mesüi tembang. Ajisüaka tanabuba India-Naga Ceasefire of 1997 ji Naga nunger atema pelatsüsa ka liasü, kechiyong India sorkari Naga nunger putiotsüji balaka ta agizük. August 3, 2015 nü Framework Agreement sign asüdang India Ato kilonser Narendra Modi-i Naga nunger putiotsü aser sobalibaji khenyongi balaka ta agizükogo. Framework Agreement ajanga Naga nunger maitsü jangjar,” ta sangdong nung shia lir.
“Temjen-i Naga linük maitsü jangjatsüla aser Naga nunger ka ama nokdaktsüla, mesüra Naga nungeri maneni pa aitsütsü. Naga nungeri pei putiotsü aser yimtenren maitsü atema meranga inyakba ilaja mejembitsüla,” ta kasa sangdong ajangasa metetdaktsü.