Minister Temjen Imna-i Khristmas jeli sentong ayonga agi

Kohima, Luchii/December 22 (TYO): Brihostibar nikongdang MS-10 den Bright Morning Star Children Home, Kohima-i Khristmas jeli sentong ka Higher Education & Technical Education Minister, Temjen Imna Along’er kidang ayongzüka agiogo; MS-10 ya pa indang official ki lir.
Minister-i Bright Morning Star Children Home, Kohima nungi tanurtem den amongtsü lemteta liasü, ajioda pai tanurtem den jangratema jembi aser pai lanuwa ajangshiba timtem lemsatepa liasü.
“Asenok nisung shiaji khenyongi balala aser iba atemaji asenoki nüma atangtsüla. Iba lima nung Tsüngremi niung shia khenyongi balala yangluba atema asenoki Tsüngrem dang pelatsüla,” ta Minister-i tanurtem dang ashi.
Bright Morning Star Children Home kibur aser Staff temi tanurtem tenzükba atema pelaba lemsatepba den külemi Minister-i tanurtem dang pa den MS-10 züngsem ajak parnok den alitsü, ta ashi.
Kasa sentong nung Bright Morning Star Children Home Superintendent, Aleno Lenny-i minister-i par kidang tanurtem asoshi iba sentong ayongba atema pa dang pelaba lemsatepa liasü. Tanurtemi Khristmas ken balala aten, asayamenü shilem agi aser tsüngsanga liasü. MS-10 züngsemtemia ken tena liasü.