Minister Tongpang Ozukum-i anir maneni shishilempaba tesem semdanger

Toll tax gate Kohima nung khu abenba gari yimtii maidabg mozu tzü rüka shitokba noksa nung angur. (Kohima, April 22, 2020)

Dimapur, Rongchii/April 22 (TYO): Kohima nung aliba shishilempaba tesemtem nung social distancing yimya amshiba ajungshitsü aser nüburtemi sorkar tuyuba shidak amshi asü mamshir jangjatsü asoshi Tongpang Ozukum, Minister Incharge for Kohima district on COVID-19 den Kohima district Task Force on COVID-19 ajanga April 22, 2020 anepdang 8:00 ako nungi tenzüka shishilempaba tesemtem sema jaja.
Minister Tongpang meina Khriehu Liezietsu, MLA, Deputy Commissioner, ADC aser ketdangsertem ao aser parnoki, danga anogotem nung shishilempaba den medemdangra tang yimya tajungba amshia kümogo, ta ashi aser nüburtemi social distancing yimya ya kanga tongtipang ta angatetba atema pelar, ta Minister Tongpang-i ashi.
“Chiyongtsü aser nüngdakba osettsüset alitsü arurtem asenoki khenyongi menokdangtet, anungji shishilempaba tesem nung kati ka nungi pila alitsüba ya dang lenmang lir, kechiaser iba ya ajanga dang coronavirus tashidak wara nungi jenbua litettsü,” ta pai ashi.
Nüburtemi social distancing yimya amshitsü asoshi committee balalai shilem tajung agiba kanga pelar aser Angami Students’ Union ajanga mapa tajung apiteta Kohima nung alir kaketshirtem pei talidaki moteti alirtem yariba asoshi parnok nem tenüngsang agütsür, ta Minister-isa ashi.
Parnoki BOC area, Razhu Point aser High School area tem semdangba sülen KMC Tool Gate-i oa KMC ajanga garitem nung mesen asütsü mozü akhaba semdanga liasü.