Minister Vikheho-i ANAEF tenzüktsüogo

Kohima, August 18 (Agencies): Tanü PWD (Roads & Bridges) Minister, Y Vikheho-i Old Civil Secretariat Kohima, Nagaland Senior Citizens Association (NSCA) Office telungtet nung All Nagaland Aphuyemi Elders Forum (ANAEF) tenzüktsüogo.
Iba sentong nung tongti tesemdanger o jembidang Minister-i, Pughoboto tesem nung mezüng Khrista dak amangbapur pei tetsü/tebou nungeri tatishitsü tajung yutsüba ajanga Aphuyemi (Pughoboto Sub-division) nüburtemi süngjang tajung achir, ta metetdaktsü.
“Pughoboto sub-division nung mezüngbuba amangbapurtemji sayutsüngirtem liasü aser tanabuba putu taintemi aibelen meinyak, aser parnoki nendaka inyakba, ochishia aliba aser mapa kanga meranga inyakba ajanga tang aliba putui süngjang tajung achir, ta paisa ashi.
Iba dak sentakba nung Minister-i iba tesem nung alirtem dang, pei tetsü/tebou nungeri inyakba mapa tajungtemji maneni benshia ochishia tongmelang alitsüla aser kati ka akhümtsübutepa alitsüla, ta ayongzük.
Tan ita ya Aphuyemi nunger atema kanga tongtibang ita lir, kechiyong iba mapang tongti tentet ana- Sumi Aphuyemi Hoho aser ANAEF na tentetogo.
Minister-isa lokti tentettem tsüngda amalitepa inyaktsü aser lokti dang nungi imlar ka masü saka lokti nem agütsür ka asütsü atema asalendong yanglutsüla, ta ashi.
Kasa sentong nung tetushi tejaoker NSCA Tir, Dr. S. I. Tushi Ao-ia ANAEF dang anema alitsü atema moko aser yi nungi pilaa alitsü, temang ajangzükba exercise balala agitsü, chiyungtsü tajung achitsüla ta ashiba den külemi lokti ajangzüktsü atema inyaktsü ajungshi.
Paisa teintet rogotem atema schemes balala- Old Age Pension, Annapurna, Old Age Home facilities, travel concessions, health care indang metetdakja liasü.
Advisor ANAEF, S. Ghunakha Swu leniba nung agiba sentong nung Executive Secretary SABAK (Pughoboto), Rev. Hotokhu P. Jimomi-i sarasadem, ANAEF Tir, P. Yeghoto Chishi-i lokti pelaa agizük, Sumi Aphuyemi Baptist Church Kohima teintet rogotem aser True Vine-i temeja ken balala aten aser ANAEF senyur, Kihito Chishi-i tepela anküp o jembia liasü.