Minister Vikheho-i Pughoboto nung GPS ana semzüktsü

May 20, 2017 nü Roads & Bridges Minister, Y Vikheho Swu-i Zunheboto district kübok Pughoboto Sub-division nung GPS ana semzüktsüba sentong nung tangokba noksa nung angur.

Kohima, May 20 (TYO): Honibarnü Roads & Bridges Minister, Y Vikheho Swu-i Zunheboto district kübok Pughoboto Sub-division nung Government Primary School (GPS) tasen ana semzüktsüogo.
Minister-i GPS Natsumi aser GPS Heboluqa semzüktsüba sentong nung pa kinüngtsü, Ahikali Swu, ADC Pughoboto Avelu Ruho aser SDEO Vikuto nunger den tanga ketdangsertem dena liasü.
Iba sentong nung jembidang Minister-i, GPS ana lapokba ajanga tanur nem shisaliok tajung agüja tajemdakdak junga yangertsü tamang akar, ta metetdaktsü.
Pughoboto sub-division nung kaketshirtem ajungshitsü mechi nung pai ‘Beyond Books’ sentong tenzüktsütsü, kong ketdangsertem, kentenertem, entrepreneurs aser artist temi school tem semdanga kaketshirtem den shisa lemsateptsü, koba ajanga tanurtem shisaliok nung dang masü saka tarutsü atema sempettem arangshitsü.
Minister-isa Sumi Aphuyemi Teachers Welfare Organisation-i iba tesem nung Government School Football Tournament ayongzüka akaba atema pelaba lemsatep.
Paisa tesayurtem dang pei mapa nung kanga nendaka inyaktsü ajungshi.
Kaketshirtem dang sobaliba aser yimya tajungtem benshitsü ayongzüka minister-i, tanurtemi pei oshi aser sobaliba akhümtsübutsüsa intetdaktsütsüji tsüraburtem khuret lir, ta ashi.
Minister-i ashiba agi, SSA programme tenzükba sülen state nung aliba sorkar school tem nung temelenshi aika adokogo.
Pai sensotem, tesayurtem aser kaketshirtem danga school infrastructure anepalua amshitsü ayongzük.
Swu-isa ashiba agi, Year of Economic Development of Pughoboto dak sendakba nung 2013 küm nungi project aika tenzüka inyakdar, aser iba nungji Piggery Project, Cycle Network, Tree Plantation, Skilling Pughoboto aser Thuwuni densema lir.
Paisa, Pughoboto ya tiyongtsü tesem ka nung lir, anungji nüburi item mapatong maongka agia rongsenkettsüng ajungkettsü ajungshi.
Minister den kinüngtsü aser ADC nungeri anir school meketa süngdong tema liasü.
GPS Natsumi nung kaketshir 32 den tesayur pezü lir aser GPS Heboluqa nung kaketshir 33 den tesayur trok lir.
School ana ya SSA senotsü agi yanglu aser school nung menden den ‘desk’ Swu-i tenla agüja liasü.