Minister Yitachu-i GHS Sungro küm 50 benjung nung aden

December 14, 2016 nü School Education & SCERT Minister, Yitachu-i GHS Sungro Golden Jubilee benjung nung nüngo sayatsüdang agiba noksa angur. 

Dimapur, Dec. 14 (TYO) : December 14, 2016 nü School Education & SCERT Minister, Yitachu-i GHS Sungro, Wokha Golden Jubilee nung tongti tesemdanger ama shilem agi.
“Asen tsüraburtem aser tetenzükertemi mangdang tulu ayuba aser tarutsü atema bilema mapa tajung inyakba meyipa reprangbaji tepela anguba mapang ka lir. Parnok mapang infrastructure, communication aser connectivity tajung meliaka reju lapoka kanga meranga inyakogo,” ta Yitachu-i ashi.
Sorkari government school tem nungi tesayur tajungtiba aser tematibatem shimaka, government school tem nung kaketshir asemsü nungi shilem ka dang azünger. Anungji asenoki iba tangatetba agientsüla aser tarutsü putupurtem anitettsüla, ta paisa ashi.
Taoba mapang school-i ajangzükbatem meyipa reprangshiba dang masü saka asenoki education system tajungba kümdaktsütsü atema bilema mapa inyaktsüla. Tanga government school temi tatishitsü agitsüsa, asenoki temelenshi adoka sayutsüla, ta Yitachu-isa ayongzük.
Paisa, tesayurtem dang quality education agütsütsü aser parnoki sayuba kaketshirtemji pei yimtsüng atema dang masü saka state aser linük asoshi tongtipang nisung ka ka akümtsüsa sayutettsüla, ta ayongzük.
Iba sentong nung tetushi süa jaoker Secretary to the Government of Nagaland for Food & Civil Supplies, Legal & Metrology and Consumer Protection, Ramongo Lotha (IAS)-ia o jembi.
Ramongo-i GHS Sungo lapokba aser iba school ajanga nisungtem anitetba indang otsü lemsatep.
Additional Director (HOD) School Education, Wonthungo Tsopoe-ia salem osang abendang, district nung government school tajungtibatem rongnung Sungro GHS dena lir, ta ashi.
Sentong nung Asstt. Development Commissioner, Wokha Mhonsao Ezung-ia o jembi, Headmistress GHS Sungro-i tesentepertem pela agizük aser AHM GHS, Sungro-i anküp tepela o jembi.