Minority Affairs ketdangseri banks, lokti tentettem den senden amen

Kohima, November 23 (TYO): Tamalen Nagaland Home Commissioner inyaka alisang aser tang Joint Secretary, Minority Affairs, Government of India, J. Alam, IAS-i sorkari sen tamshidak anentsüba onük nung November 23 nü DC Conference hall, Kohima nung banks aser lokti tentettem den senden ka menogo.
Iba senden nung jembidang J. Alam-i, November 8 nü sorkari sen 500 aser 1000 anentsüba sangdong agütsü, iba sülen India sorkar kübok tongti ketdangsertem dang sorkar mapatong ya benoka inyakdang tayongzükbatem, jenjang aser nüburtemi ajangshiba timtem balala asadangtsü atema tuyua liasü, ta metetdaktsü.
Paisa, pai state semdangba ya tongtibangsa sen ishika indang notes tem koma angur, timtem aser nüburtem nüngdak atema koma achaayangdar, itemji reprangdanga asadangtsü atema aru, ta metetdaktsü.
Pai state nung ATM booths indang jembiba den külemi itemji ajanga nüburtem koma tenzüker iba indang jembi. Paisa state nung ATMs dak sentakba nung metokmeperitem indang asüngdanga liasü.
Pai ashiba agi, ATMs ji talisa sen 500 aser 1000 notes agizüktsü atema yanglu.
O lemtepba mapang Kohima Chamber of Commerce & Industry (KCCI) Tiri, state nung shishilembabaji timbaka aluyimba nung ajemdaker lir, ibayongji sen ishika indang notes agi kangasa anüng-aponga timtemer, ta metetdaktsü.
Paisa, benjung mongpu ana nung lir aser Hornbill festival-a atonger anungji sen ishika indang notes nüngdaker, iba den külemi ATMs peria mali aser item jagi mapa junga meinyaker, ta metetdaktsü.
Administrator KMC, Kovi Meyase-ia nüburtemi ajangshiba timtem balala metetdaktsü aser sorkar telemtetba ajanga bank accounts malir fixed aser contract basis nung inyakertemi timtem kanga ajangshiba indang metetdaktsü.
Paisa, bank accounts tasen tezübaba lenmang ajanga lapoktettsüsa financial institution-i tekaraba nung maongka balala agütsüdaktsüner, koba ajanga nüburtem nüngdak peritsütsü, ta ashi.
Iba senden nung Angami Public Organisation, All Nagaland Taxi Association, Truck Owners’ Association, City Bus Union densema mulungtet telok aikati shilem agia pei tebilemba balala lemsatepa liasü.