Minute 26 tsüngda Royal Enfield ‘Despatch Edition’ 200 ayok

July 16, 2015: Taküm May ita nung Royal Enfield-i, Classic 500 Limited edition model – Despatch sayatsü aser kobi melii ayoktsü ta sangdonga liasü.
“India nung Royal Enfield bike meimba indang onoki meteter aser online ajanga iba limited edition bike ayoktsü asoshi kodang company-i telemtetba agiba mapang telangzübaji kanga junga liasü,” ta Royal Enfield-i ashi.
Royal Enfield-i ashiba agi, online booking lapoktsüba sülen minute 26 tsüngda limited edition bike 200 yokogo. Iba limited edition Despatch motorcycles ji Rs. 2.05 lakh (ex-showroom Mumbai) lir.
Sentsü shia bike 200 dang yanglu aser bike shia nungji manufacture indang tejangja hallmark balala inoka lir aser teka agi signature camouflage pattern ka inoka lir. Iba bike tereprangtsü balaka asübaji engine aser exhaust pipe sentsü tanak atepba ajanga lir.
Ano ayoktsü asoshi sentsü tasen anaji ‘Desert Storm Despatch’ aser ‘Squadron Blue Despatch’ asütsü. Classic 500 Despatch nung 499cc tashi lir aser single-cylinder den air-cooled petrol engine ajanga 27.2bhp senzüteter.
Taküm bike aika yoktettsü ta company-i imladagi kechiyong 2015 küm mezüng ita asem kija nunga bike 92,845 units tashi yokogo.
Yaküm Company-i ita ka nung bike 30,000 yanglua liasü aser taküm küm tatemlen tashi nungbo ita shia bike 50,000 units yanglutsü, ta company-i sangdongogo.