Mirage Fighter Aircraft ka tsükok; pilot anaprong asü

February 01, 2019 nü Bengaluru nung Mirage-2000 fighter tayimtsü tsükokba tesem nung police nokdaka aliba noksa nung angur. IAF indang raradang amshiba tayimtsü ya Bengaluru anasa aliba military airport runway nungi apusoba sülen mapang tatsüka tsüngda tsükok. 

Bengaluru (Karnataka), February 01 (Agencies): Tanü Bengaluru nung aliba Hindustan Aeronautics Limited (HAL) indang airport nungi Mirage fighter aircraft ka apusoba sülen mapang tatsüka tsüngda tsükok, aser iba lendong nung tayimtsü nung mena alir pilot anaprong süogo.
Pilot anaji Sqn Ldr, Sameer Abrol aser Sqn Ldr, Siddhartha Negi na liasü ta jangjaogo.
Ketdangsertemi ashiba agi, pilot ana jagi ‘eject’ asutsü merang ajisüaka tayimtsüji ola tashii adoka apokba den külemi tena mi agi rongset.
“Tanep Mirage 2000 trainer aircraft ka HAL Airport, Bengaluru nung tsükokogo,” ta Defence public relation officer kati metetdaktsü.
“Yangji mena alir anaprong kanga mejungi yiru. Osang tejangja atadar. Iba lendong atalokba kuli bushitsü atema tuyutsü,” ta paisa ashi.
Iba tayimtsüji Indian Air Force (IAF) nungi test pilot anati ania liasü. Iba tayimtsüji HAL-i upgrade asuba sülen Squadron Leader Negi aser Squadron Leader Abrol nati ‘acceptance test flight’ atema tayimtsüji anidangba liasü.
Iba lendong atalokba sülen ketdangsertemi kümzükba maparen inyak. Pilot ana rongnung kabo tayimtsü nungi ‘eject’ sütet ajisüaka tayimtsü terongdak nungji anenba ajanga asü. Ano tanga pilot ka hospital-i anir ao, ajisüaka mekümzükteti asü, ta IAF osang ka ajanga metetdaktsü.
Tayimtsü tsükokba kuliji tang tashi nungbo mejangja, ajisüaka mezüng bushisüngdangba ajangabo tayimsü nungji technical timtem kar liasü ta bushitetogo. Jungjunga bushisüngdangba ajanga lendong atalokba kuliji tejangja metettsü.
Hindustan Aeronatics Limited (HAL)-i France den tezüngzüktep ka agia aliba kübok Indian Air Force indang Mirage-2000 fighter aircraft upgrade südar.
France nunger company, Dassault Aviation-i tayimtsü 49 nungi ana upgrade asü aser tanüngba tayimtsütemji HAL-i upgrade asür.