Mirza-i World No. 1 kümnabuba atonga ajangzüker

Madrid, October 31 (Agencies): India’er tetsür tennis asayar mongin, Sania Mirza-i tetsür doubles shilem nung World No. 1 jenjang taküm agi kümnabuba tashi atonga ajangzükba osang jangjaogo.
Mirza aser la den külemi asayala, Switzerland tsür, Martina Hingis nati tan Deobar nü tembangba WTA Finals asayamong semifinal nung tamakok ajurua liasü saka Mirza-i maneni World No. 1 jenjang abentsü temeten angu.
Ekaterina Makarova aser Elena Vesnina nati defending champions, Mirza o Hingis na tsükdaktsüba sülen maneni Bethanie Mattek-Sands o Lucie Safarov na final nung tsükdakja, tetsür doubles takok marok agizüka liasü.
“Ni taküm agi kümnabuba tashi World No. 1 jenjang abentsü temeten anguba atema kanga pelar,” ta Mirza-ia metetdaktsü.
Taküm 2016 küm tenzüker tanü tashi nung Mirza-i Hingis den aroki lungjemer Australian Open aser Barbora Strycova den lungjemer Cincinnati Masters takok marok agizükogo.
Ano külen, Serbia nunger Novak Djokovic-ia ajak agi points 12.900 ajangzüka, tebur singles asayar tarensen nung maneni World No. 1 jenjang abentsü temeten anguba osang ka Association of Tennis Professionals (ATP) asayar tarensen tanü, Hombar nü adoktsüba ajanga jangjaogo.
Djokovic sülen anidaka, Britain nunger Andy Murray-i points 10.985 ajangzüka, World No.2 aser Switzerland nunger Stan Wawrinka-i points 5.865 ngua, World No. 3 jenjang nguogo.