Mirza o Hingis na Brisbane International final-i iogo

Brisbane, January 08 (Agencies): India tsür Sania Mirza aser Switzerland tsür Martina Hingis nati takok ngua tang tasayadak Brisbane International tennis asayamong tetsür doubles shilem indang final asayatsü jenjang tanü Hokolbar nü nguogo.
Tan asayamong nung temaba jenjang abener, Mirza o Hingis nati points 6-3 7-5 ngua Slovakia tsür Andreja Klepac aser Russia tsür Alla Kudryavtseva na semifinal asaya nung tsükdakja iba jenjang tajungji angu.
Tan takok anguba ya Mirza o Hingis nati aroki lungjemer asaya 25 buba atonga akoker lir.
Tetsür doubles World No. 1, Mirza o Hingis nati Spain tsür, Anabel Medina Garrigues o Arantxa Parra Santonja na aser Germany tsür Angelique Kerber o Andrea Petkovic na tsüngda asayaba tanabuba semifinal asaya nung takoker den final nung ajuruteptsü.
Yaküm 2015 küm tongti takok marok 5 tashi agizüker, Mirza o Hingis nati tanü takok anguba sülen taoba mapang, 2012 nung Italy tsür, Sara Errani o Roberta Vinci nati yangluba asaya 25 tashi atonga akokba otsü meneper lir.
“Taküm küma takokba nung tenzükba atema kanga pelar. Mirza künati maneni final nung shilem agitsü jenjang anguba ya maongka tulu lir,” ta Hingis-i tesülen metetdaktsü.