Mirza o Hingis na Rogers Cup semi tongogo

Toronto, August 15 (Agencies): India tsür Sania Mirza aser la den külemi asayala, Switzerland tsür Martina Hingis nati Chinese Taipei tsür, Hao-Ching Chan aser Yung-Jan Chan na madak takok ngua tang tasayadak Rogers Cup tetsür doubles shilem indang semifinal asayatsü jenjang yashi Hokolbar nü ajangzükogo.
Tetsür doubles shilem nung World No. 1, Mirza o Hingis nati yashi points 6-4, 6-2 ngua Hao o Yung na quarterfinal asaya nung tsükdaktsü.
Tenati France tsür Caroline Garcia aser Slovenia tsür Katarina Srebotnik na den semifinal nung ajuruteptsü.
Caroline o Katarina natia yashi points 6-3, 6-2 ngua Romania tsür, Irina-Camelia Begu aser Raluca Olaru na madak quarterfinal asaya akok.
Ano külen, 2015 Rajiv Gandhi Khel Ratna agütsütsü asoshi Mirza tenüng yashi, Hokolbar nü shimtetba osang jangjaogo.
“Nungtugu Khel Ratna sempet agütsütsü atema kü tenüng shimtetba atema kanga pelar. Iba sempet agizükba ajanga ni ozü India linük asoshi maneni takokba jenti bener arutsütsü ajungmesotsü,” ta Mirza-ia yashi metetdaktsü.
Tang tetsür doubles shilem nung World No. 1 jenjang ngua alila, Mirza-i Hingis den külemi lungjemer 2015 Wimbledon takok marok agizükba sülen tetsür doubles shilem indang Grand Slam takok marok agizüker mezüngbuba India’er tetsür asayar küma otsü yanglu.
Atlanta Olympics nung bronze medal 1996 küm agizükba sülen Khel Ratna sempet agizüksang, Leander Paes sülenbo Mirza ya iba nungtugu sempet agütsütsü asoshi tenüng shimtetba India’er tennis asayar tanabuba lir.
Arishi küm 28 tain Mirza nem senpet sen lakh 7.5 aser kulikaket na densemba Khel Ratna sempetji India Tir, Pranab Mukherjee-i National Sports Day amongnü, tan August ita 29 nü agütsütsü sentong renema lir.