Mirza o Hingis nati lenmang balala aotsü lemteter

New Delhi, August 09 (Agencies): India’er tetsür tennis asayar mongin, Sania Mirza aser Switzerland tsür, Martina Hingis nati joko aroki lungjemer masayai lenmang balala aotsü telemtetba ka agiogo.
Mirza aser Hingis nati yaküm, 2015 küm March ita nungi tenzüka aroki lungjemer asayatsü tenzükba sülen Indian Wells, Miami aser Charleston takok marok densema, yaküm küm tatemlen tashi nung tongti asayamong takok marok 9 tashi agizüka liasü.
Tenati Charleston takok marok agizükba sülen Mirza-i tetsür doubles asayar tarensen nung World No. 1 akümtsü jenjang anguba den külemi, Hingis den aroki lungjemer Wimbledon takok maroka agizüka, tetsür doubles Grand Slam takokba mezüngsüa agizüktsü jenjang tajung angu.
2016 Australian Open takok marok densema, Mirza o Hingis nati taküm, 2016 küma tongti takok marok 4 tashi agizüka liasü.
Tenati aroki lungjemer ita 16 tashi asayadang ajak agi takok marok 14 tashi agizükba osang bushitetogo.
“Mirza aser Hingis nati peipei lenmangi aotsü lemtetogo. Tenati aroki lungjemer taoba ita 5 tashi imlaba ama takok mongutetba yong tenati iba telemtetbaji agi,” ta Mirza’er ketdangser kati osang jangjashitsü.
Mirza-i tarutsü anogotem nung tetsür World No. 21, Czech Republic tsür, Barbora Strycova den aroki asayatsü aser Hingis-ia America tsür, Coco Vandeweghe den aroki lungjemer tarutsü mapang asayatsü renemogo.
Mirza-i Barbora den aroki lungjemer par mezüng asaya America tsür, Bethanie o Mattek Sands na den Cincinnati nung toktepa asayaba sülen tenati maneni US Open asayamong nunga toktepa shilem agitsü renema lir.