Mirza o Hingis nati Sydney International takok marok agizükogo

Sydney, January 15 (Agencies): India tsür, Sania Mirza aser Switzerland tsür, Martina Hingis nati final asaya nung takok ngua WTA Sydney International tetsür doubles shilem indang takok marok tanü Hokolbar nü agizükogo.

Tetsür doubles shilem nung World No. 1, Mirza o Hingis nati tanü ghonda 1 ser minute 13 nung points 1-6, 7-5, 10-5 ngua France tsür, Caroline Garcia o Kristina Mladenovic na final asaya nung tsükdaktsü.

Tanü final asaya akokba ya Mirza o Hingis nati aroki asayatsü tenzüker tanü tashi nung asaya 30 buba atonga akoker lir.

Ano, tan agizükba takok marok ya tenati aroki asayatsü tenzüker tanü tashi nung takok marok 11 buba aser taküm, 2016 küm tenzüker tanü tashi nung takok marok 2 buba agizüker lir.

Ano külen, Russia tsür, Svetlana Kuznetsova-ia Puerto Rica tsür, Monica Puig madak final asaya koka tetsür singles shilem indang takok marok tanü agizükba osang jangjaogo.

25 buba jenjang nung alila, Kuznetsova-i tanü minute 55 nung points 6-0, 6-2 ngua 94 buba jenjang nung alir, Puig ayong ayonga tsükdaktsü.

Tan agi Sydney asayamong nung 11 benbuba atema shilem agila, arishi küm 30 tain Kuznetsova-i tanü ace 8 tashi yanglua takok anguba sülen lai tennis asayatsü tenzüker tanü tashi nung takok marok 16 buba agizüker asayar kümogo.