Mirza o Hingis nati tetsür doubles takok marok agizükogo

Switzerland tsür, Martina Hingis (Abelen) aser India tsür, Sania Mirza nati final asaya akokba sülen 2016 Australian Open tetsür doubles shilem indang takok marok amer agiba noksa nung angur. (Melbourne, January 29)

Melbourne, January 29 (Agencies): India tsür, Sania Mirza aser Switzerland tsür, Martina Hingis nati final asaya akokba sülen 2016 Australian Open tetsür doubles shilem indang takok marok tanü, Hokolbar nü agizükogo.
Tan asayamong nung temaba jenjang abener, Sania o Mirza nati tanü ghonda 1 ser minute 48 nung points 7-6 (7-1) 6-3 ngua 7 buba jenjang nung alir Czech Republic tsür, Andrea Hlavackova o Lucie Hradecka na final asaya nung tsükdaktsü.
Tetsür doubles World No.1, Mirza o Sania nati külemi lungjemer asayatsü tenzükba sülen tan agi Grand Slam takok marok 3 buba atonga agizüker lir.
Tenati lungjemer tan agi takok marok 12 buba akokba den külemi, tanü asaya akokba sülen tena asaya 36 buba atonga akoker asayar kümogo.
Mirza asoshia tan takok marok agizükba ya ajak agi Grand Slam takok marok 6 buba agizüker lir.
“Australian Open takok marok anguba atema kanga pelar. Hingis ya sempet tajung akar champion asayar ka lir aser ni la den külemi asayatsü maongka anguba atema kanga pelar,” ta arishi küm 29 tain Mirza-i tesülen metetdaktsü.
Mirza-i tanü tetsür doubles takok marok agizük aka, lai Croatia nunger Ivan Dodig den külemi lungjemer asayaba mixed doubles semifinal asaya nungbo tamakok ajurua liasü.
Russia tsür, Elena Vesnina aser Brazil nunger Bruno Soares nati tanü points 7-5 7-6 ngua Mirza o Dodig na tsükdaktsü.
Ano külen, Britain nunger Andy Murray-i ghonda 4 ser minute 3 nung points 4-6, 7-5, 6-7 (4/7), 6-4, 6-2 ngua Canada nunger Milos Raonic semifinal asaya nung tsükdakja tebur singles final asayatsü jenjang yasüng, Brehostibar aonung ajangzükogo.
Tan agi Australian Open final nung 5 benbuba atema shilem agitsü maongka angusang, Murray-i Serbia nunger Novak Djokovic den final nung ajuruteptsü.