Mirza o Strycova nati Pan Pacific Open takok marok agizükogo

India tsür, Sania Mirza (Abelen) aser Czech Republic tsür, Barbora Strycova nati Pan Pacific Open tetsür doubles takok marok agizükba sülen tenati pelatepa agiba noksa ka yangi angur. (Tokyo, Sept 24)

Tokyo, September 24 (Agencies): India tsür, Sania Mirza aser la den külemi asayala, Czech Republic tsür, Barbora Strycova nati par final asaya koka, Pan Pacific Open tetsür doubles takok marok Japan kübok Tokyo yimti nung tanü, Honibar nü agizükogo.
Tan asayamong nung 2 buba jenjang abener, Mirza o Strycova nati tanü minute 52 nung points 6-1, 6-1 ngua, China tsür, Chen Liang o Zhaoxuan Yang na ayong ayonga tsükdaktsü.
Tan takok marok agizükba ya Mirza o Strycova nati aroki lungjemer asayatsü tenzüker tanü tashi nung tetsür doubles takok marok tanabuba agizüker lir.
Zimbabwe  tsür, Cara Black den aroki lungjemer 2013 aser 2014 na nung takok marok agizükba densema, Mirza-i küm 4 tsüngda nung tan agi Pan Pacific Open tetsür doubles takok marok 3 buba agizüker lir.
Ano külen, tetsür singles shilem nung Denmark tsür, Caroline Wozniacki-i lar semifinal asaya koka, Japan tsür, Naomi Osaka den final asayatsü jenjang tanü nguogo.
Taoba World No. 1, Wozniacki-i tanü ghonda 2 ser minute 50 nung points 4-6 7-5 6-4 ngua, Poland tsür, Agnieszka Radwanska tsükdaktsü.
Tanabuba semifinal asaya nung Osaka-ia ghonda 1 ser minute 47 nung points 1-6 6-3 6-2 agi Ukraine tsür, Elina Svitolina tsükdakja, final asayatsü jenjang ajangzüka liasü.
Wozniacki o Osaka nati asüng, Deobar nü final asayatsü aser iba asayaji tenati mezüngsüa ajurutepa asayaba asaya alitsü.