Mirza, Tendulkar & Bhutia nunger linük naklu ken video nung shilem agitsü

New Delhi, January 20 (Agencies): 67 buba India Republic Day anogomong den sentaktepa yangluba linük naklu ken video nung India’er asayar mongintem, Sachin Tendulkar, Baichung Bhutia aser Sania Mirza nungeri shilem agitsü renemba osang ka metetdaktsüogo.
Iba linük naklu ken video ya Mumbai spinner, Nilesh Kulkarni-i produce asütsü renemba osang ka The Times of India osangia metetdaktsüogo.
“India linük indang naklu ken, Jana Gana Mana nung tan mezüngsüa India’er asayar mongintemi shilem agitsü renemer lir. Parnoki India tenüng nung toktepa shilem agiba ajanga India ajunga lungjemer aser iba yongji, India ajunga shisatsü aser tangatetba ajunga nung ka küma lungjemdaktsüsü nükjidong nung tan linük naklu ken video ya yanglua adoktsütsü renemogo,” ta Kulkarni-ia metetdaktsü.
Bollywood music director, Ram Sampath-i mejemtsüba music amshia iba linük naklu ken video ya Abhijit Panse-i direct süa Mumbai yimti nung yanglutsü sentong renema lir.
Iba linük naklu ken video ya Tendulkar-i 67 buba India Republic Day anogomong amongtsü anogo 2 tejaklen Mumbai yimti nung sayatsütsü sentong renemogo ta osangji shisem.