Mishra-ai Ghulam Ali Delhi nung kenten sentong agitsü jaok

New Delhi, October 8 (Agencies): Pakistan nungi kentener Ghulam Ali Mumbai nung kenten sentong ka agütsütsü liasü saka Shiv Sena-i amokmerenba ajanga makateti lia Delhi Tourism Minister Kapil Mishra-i iba sentong Delhi nung arua akatsü asoshi pa Brihostibar nü jaokogo.

“Ghulam Ali Mumbai nung sentong magitetba asoshi kanga nemjema bilemtsür. Ni pa Delhi nung arua iba sentong akatsü jaokogo. Ken agi kecha arrtsü memetet,” ta Mishra-i twitter ajanga lemsatepa liasü.

Arishi küm 75 tain, kentensang, Ghulam Ali ya kentener asür, Jagjit Singh tasüba anogo nung pa bilemteta tetsüshi agütsüba hopta sentong den sentaktepa Mumbai aser Pune na sema ken tena jajatsü sentong liasü. Aji oda süaka Mumbai nung Shiv Sena teloki Bodhbar nü pa sentong nung timtem agütsütsü ta amokmerena tidaktsü.

News channel ka dang Ali-i, “Iba sentong nung adentsü jangraseta atartem nükjidong mataloktsüba aser adianu amai alisang, Jagjit Singh bilemteta amungba sentong nung shilem magitetba asoshi kanga nemjema bilemer,” ta ashi.

“Iba sentong ya India aser Pakistan na tebilemtsü ka ama masü saka temeim temaitsü lir,” ta pai shisem.

Maharastra Chief Minister Devendra Fadnavis-ia iba sentong magitetba asoshi kanga sasa bilemtsüogo. Ali indang sentong nung ozü sorkari security kanga tashi ita lidaktsütsü, ta pai ashi.

Aji süaka iba dak sentakba nung Shiv Sena-i, India aser Pakistan arrtsülen tai maketba nisungtem taküm samatsüba ajanga nüburtemi iba sentong nanga magizüktettsü, ta kanga akhanga nokdaker.

“Mapang aika nung yimjung raksaa kahteper. Iba ama lendong agi sünga aliba mapang ka nung asenok pelatepa amungtsü masü,” ta Shiv Sena lennir Aditya Thakre-i Mumbai nung osangbenertem dang ashi.