Miss Dimapur 2015 sülen Nagaland model temi pelaba lemsatep

Dimapur, October 02 (TYO): Tobur ajungba aser sempet tajung aketba tsütsü Northeast-a tangar sülenbosa masü. Miss Dimapur 2015 Contest nung shilem agitsü asoshi ayir tobur tajung parnok 15 tashi Dimapur yimti nung shilem agia liasü. Iba sentong ya Ethnic Group of Nagaland aser Dimapur district administration na asalendong aser lenisüba nung takok ngua agitetogo.
Taoba mapang model aikati ashiba agi, modelling asüba tsütsü tetsürtem asoshi maongka aika lir.
2009 Miss Dimapur, Kajeni Kromeh-i, “Tanü asüngbo iba tetoktepba nung shilem agir aika kümogo. Onok mapangbo shielm agir kanga ajema liasü anungji tangbo temelenshi kanga ajiteter,” ta ashi.
Model Ketholeno Kense-i, “Nagaland ya India nung state tila ka lir aser linük nung aliba tanga state tem den kodang apidangdir fashion industry tsütsü ano tangar memenep, ajisüaka kenü anogobo asenokia parnok jenjangji tongtettsü amanger,” ta ashi.
Tobur ajungba toktepba den külemi Tibet nungia sobaliba tsüngsang ka agi shilem agiba ajanga nüburtem kanga jangratemdakja liasü. Tanurtemia designer balalai yangluba sobutsü sobur shilem agi aser tebur tanur telok katia hip-hop tsüngsang ka agi telok peladaktsü.
Tan Miss Dimapur 2015 adokla, Zehovire Avi Kechu-i, “Ya kanga junger! Joko ni Miss Nagaland aoshi inyakyim tenzüktsü,” ta pelaseta ashi.
Northeast nung jila aser yimti tem nungi tetsür temi fashion nung kanga meranga shilem agir. Iba amala sentong ajanga model asüba tsütsü tetsürtem asoshi lenmang sadema lapoktsür.