Miss. Dimapur tetoktepba Oct 27 nü agitsü

Dimapur, October 21 (TYO): Miss Dimapur beauty pageant ayongzükba official, Ethnic Group of Nagaland (EGoN)-i Miss Dimapur shimtsü atema kanga mazüngi inyakdagi, aser iba tetoktepba tatembangbuba sentong October 27, 2017 nü ayonga akatsü.
Tang tashi Miss Dimapur shimba kanga takok ngua aruba agi melungsüa EGoN Tir, Miranda Jamir-i, nü mangdang ataloktsü atema Miss Dimapur ya sabang tajung ka lir, ta ashi.
Lai, “Beauty pageants ajanga tepor tajung ajak nem pei sempet sayutsü atema sabang agutsür; nisung aikati shilem agia iba nungi tajangzük nguogo,” ta ashi.
Taküm iba sentong nung Miss. Dimapur 2017 takok korang atema tepor tajung aiür 18-i tokteptsü aser tatembangbuba tetoktepbaji October 27, 2017 nikongdang 4:00 ako nungi IMC Hall Dimapur nung akatsü.
Ethnic Group of Nagaland (EGoN)-i screening agiba sülen Miss Dimapur 2017 atema tetsür 18 shimogo.
October 23 nü AIDA beautician trainer, Talichila-i tetoktepertem nem kou aser tepor ajungba indang training agutsütsü, iba sülen clean election seminar ka agitsü, aser shisalen sayurji Roland Mery, AEO Dimapur asütsü.
October 24, 2017 nü Nagaland Armed Police Training Center (NAPTC), Chumukedima-i ayonga fitness competition agitsü, aser iba sentong nung Nagaland nungi Olympics nung shilem agir tanabuba aser tetsür rongnungbo mezüng shilem agir, Chekrovolu Swuro-i Miss Dimapur beauty pageant tetoktepertem den shisa lemsateptsü aser Archery indang crash course agutsütsü. Iba sülen Miss Dimapur atema official photo shoot agitsü.
October 25 aser 26 nü tetokteper nem soft skills, ethics, grooming session aser catwalk training agutsütsü.
October 27 nü Miss. Dimapur 2017 shimba dak alia 1st runner up aser 2nd runner up shimtsü, iba dak alia sub-titles: Miss. Photogenic, Miss Catwalk, Miss Congeniality, Style Icon 2017, EGoN Fitness Icon, EGoN Fresh Face, Best Ethnic Wear, Miss. Body Beautiful aser Miss. Beautiful Skin alitsü.