Miss Mokokchung 2015 Nov 6 aonung alitsü

Mokokchung, October 20 (TYO): November 6 nü Miss Mokokchung 2015 tetoktepba sentong “Nurturing Oneself” omen nung ajemdaker yangi Mokokchung town hall nung ayongzüka lir ta tayonger Mokokchung Art & Aesthetic Management (MAAM) sangdong ka ajanga metetdaktsüogo.

Iba sentong ya Mokokchung District Art & Culture Council (MDACC) akhüm nung MAAM-i ayonger. Iba dak sentakba nung Oct 19 nungi tenzüka shisalen sayur balalai “Miss Mokokchung 2015” nung shilem agitsüpur nem yimya-awashi, libaliro aser jembishinüba onük balala nung tesayuba agütsüba “grooming” maparen agidaki.

Grooming sentong ya anogo pezünü agitsü aser Oct 19 nü ‘Art & Skill of Interaction & Conversation’ onük nung Fazl Ali College nung English tesayur Narola Nizo-i agi. Oct 20 nü “Personal Hygiene, Health & HIV” onük nung Mokokchung IMDH (ART) Medical Officer Dr. Temsümenla Lkri agiogo.

Oct 21 nüji “Career Guidance & Counselling” onük nung FAC nungisa tesayur Amongla N Jamiri jembitsü. Oct 22 nü “Beauty Tips” nung Beatician Alipoklai agütsütsü. Oct 23 nüji “Face of A Women” onük nung Dr. Anungla Jamiri jembitsü tarensen lir.

Taküm balaka Mokokchung town tenzüker küm 125 ajunger asünung, iba nüngtem takoker nem senpet sen den ano gift hampers tajung renemtsütsü ta tayongertemisa metetdaktsüogo.

“Taküm balaka contestant-temji tajung tesa, anungji, tetoktepbaji jangratemtsüka asütsü imlar” ta MAAM tiri ashi. Iba den ano taküm Miss Mokokchung sentongji nüngtugu choreographer Toshizeni choreograph asütsü ta laisa shisem.

“Yaküm Miss Mokokchung sentong dak sentakba nung kija, kibong aser teloktemi tenla balala ajanga yaritepba agi takok nguogo, taküm balaka Mokokchung town quasquicentennial nüngtem tajungtiba ayongtsü merangdaki, anungji, ajaki tangatetba nung maneni yaritepdaktsüner” ta MAAM tirisa ayongzüka ashi.

MAAM telok ya nisung ishika lungjemer lokti nung tajangzük mapa inyaktsü nükjidong yur tenzükba lir. Yaküm küma parnoki Miss Mokokchung sentong ayongba nungi tajangzük anguba sen agi Mokokchung IMDH nung koda masür cancer agi shirangertem yaria liasü aser iba nüngtem parnoki cancer patient fund dena lapoka lir.

Yaküm “Miss Mokokchung 2014” show indang DVD menünga adoka lir, anungji, taginertemi MAAM züngsemtem den tongteprateptsü akok. Iba DVD jenjangji 150/- dang alitsü. Nisung kari danga Miss Mokokchung dak sentakba nung osang tejangja aginüra iba mobile number (7085285059) nung tongteprateptsü akok.