‘Miss Mokokchung 2015’ taonung shimtsü

Mokokchung, Nov. 5 (TYO) : October 17, 2015 nungi tenzüka “Miss Mokokchung 2015” nung shilem agitsüpur tetokteper parnok 11 nem tayongeri lenla balala nung tesayuba agüja arur, tesüsabuba November 6 Hokolbar nikongdang 5:00 ako nungi tenzüka yangi Mokokchung town hall nung tetoktepertemi pei sempettem sayutsü mapang tongogo.

Taküm Miss Mokokchung nung tetoktepertemji tajung tesa lir, anungji, iba aonung tedendangertema terabo timtem agia shimtsü südi ta imlar. Iba sentongji tajung asütsü, kechiyong sentong ajakji nüngtugu choreographer Toshizen-i achayangtsü.

Iba aonung Miss Mokokchung sentong agiba lenla nung kentener Tiasula Imchen & Imtijungla, Renthingo, Tiasula Ao, Madang Mongro, Talipokyim, Nüksung Jamir (serenade ken), guitarist Yanger nungertemi shilem agitsü renema lir. Sentong nung New Page teloki musical jilushi ka aitsü. Iba aonung osang tajung kaji Nagaland nung nüngtugu host Arenla Lemtur-i sentong ketdang asütsü.

Takoker asem nem senpet sen den meimlaba gift hampers tulu renemja lir aser Mokokchung T.K Skill nung ita trok atema angati fashion designing course agütsütsü ta angazüker. Ano sub-titles item nungi; Miss Congeniality, Miss Photogenic, Miss Healthy Skin, Best Traditional Wear, Best Gown, Miss Body Beautiful, Miss Vivacious aser Miss Philanthropic nungertem shima senpet agütsütsü.

Nisung kar danga ticket kong alitsü ta ratamataa alinunga, Mokokchung nung aliba La Store, IT Enterprise (Near FAC Buss Stand), Aier Bakery & Greeting Craft dokan tem nung angutsü. Ano Miss Mokokchung agiba aonungjia gate nunga talitsü angutsü.

Taküm iba sentong ya Mokokchung Art & Aesthetic Management (MAAM)-i ayonger. Sentong nung Parliamentary Secretary for Tourism, C Apok Jamir tongti tesemdanger aser Padmashree Chubalemla Ao tetushi tejaoker asütsü jaoka lir. Taoba Nagaland Chief Secretary, Banou Z Jamir shiba MAAM patron lir, laa iba sentong nung adentsü ta angazüker.