Miss Mokokchung 2018 Sangtennü akatsü renema lir

Miss Mokokchung 2018 nung tokteptsüpurtem tangokba noksa nung angur.

Mokokchung, Yimpoksüi/November 18 (TYO): Yimpoksüi/Nov 20 nikongtsütsü Miss Mokokchung 2018 titel atema tetokteper parnok 11 tokteptsü asoshi renema lir.
Taküm Miss Mokokchung beauty pageant ya Mokokchung District Arts & Culture Council (MDACC) kübok Mokokchung Urbane Shows and Episodes (Muse) puri ayonga akatsü aser Lambre-i sponsore asütsü.
Multi-Purpose Sports Complex nung Amungnü nikongtsütsü osangbenertem den sensaksemba mapang Muse ketdangser kati ashiba agi, Miss Mokokchung 2018 takok ngua akatsü asoshi Muse puri sentong kanga junga asameyangdar.
Iba sentong nung tetushi tesemdanger MLA CL John asütsü aser Banuo Z Jamir IAS (taoba Nagaland govt. chief secretary) o YouthNet ngutetla Hekani Jakhalu nati alakteta tejaoker ama arua shilem agitsü.
Taküm iba sentong ‘Beyond Beauty’ omen nung ajemdaker akatsü. Muse züngsem Imlibenla Wati-i, taküm iba sentong nung tetokteper rongnung district nem konang tetushi bener arutsütsü pur densema lir, ta ashi.
Maneni Muse züngsem Kaheli Chophy-i ashiba agi, taküm iba sentong tali mera ketdaktsütsü asoshi parnoki sentong tajung renema lir.
Iba sentong takok asoshi nüngtugu Choreographer Adang Jamir-i sentong yanglua sentong ajak tatongi reherse süogo. Kasa mapang nung tetoktepertemi Amini N’Ngullie (official designer) indang latest design tem iba sentong nung sayutsü. Iba show indang official makeup artist-ji Johnny D’ Ascoli asütsü.
Taküm Miss Mokokchung takoker nem senpet sen lakh 1 den gift hampers agütsütsü aser tanabuba aser tasembuba jenjang nung takok angurnem senpet sen 50,000 aser 25,000 agütsütsü. Iba sentong reprangtsü atema ticket tem iba sentong agiba aonung Multi-Purpose Sports Complex nung angutsü.