Miss Philippines-i Miss Universe 2015 takok korang angu

Miss Universe 2014 Colombia tsür Paulina Vega-i Miss Philippines Pia Alonzo Wurtzbach nem Miss Universe 2015 takok korang semoktsüba angur.

Las Vegas, December 21 (Agencies) : Deobarnü Miss Universe tetoktepba sentong nung takokertem tenüngtem yimjak nung zünga metetdaktsüdang sentong lenisangi aibelena takoker tenüng ashi.

Shitakba agibo takok korang angurji Miss Philippines Pia Alonzo Wurtzbach liasü saka sentong lennir comedian Steve Harvey-i Miss Colombia, Ariadna Gutierrez-i takok angu ta aibelena ashi.

Osang sangoktsüba sülen Miss Universe 2014 Colombia tsür Paulina Vega-i Gutierrez nem takok korang semoktsü.

Iba sülen Harvey-i aibelen meteta tatok meshi aser takok korang angur tenüng shitakba metetdaktsü.

Mapang tatsüka atema Ariadna takok korang angur ka ama shilem agi aser lai telok dak teka ayiplokja alidang, Harvey-i “Ni tatok meshir. Tanabuba jenjang angurji Colombia lir” ta ashi.

“Miss Universe 2015 ji Philippines lir” ta paisa shisem aser idangji Miss Colombia-i sabang tiyongtsü toktsü.

Nisung ajak terata ka nung lia Vega tanaben sabangi aru aser Guiterrez kolak nungi korang agizüker Wurtzbach nem semoktsü.

Wurtzbach-i tetokteper 80 madak takok angu aser tasembuba jenjang nung Miss USA Olivia Jordan-i takok angu.

Sentong tembangba sülen Harvey-i Twitter nung tatok meshia osang sangdong.

“Ni Miss Colombia & Miss Philippines dang ni aibelenba atema tatok meshir. Ni kanga nemjema bilemer” ta pai ashi.

Taküm tetoktepba nung tetendangertemji actress Niecy Nash, celebrity entertainment mogul Perez Hilton, taoba Miss Universe Olivia Culpo aser football legend Emmitt Smith nunger liasü.

Planet Hollywood nung sentong agidang kentenertem Charlie Puth, Seal aser The Band Perry nungeri shilem agi.

India-i tesüsabuba Miss Universe takok korang angubaji 2000 küm Lara Dutta-i anguba liasü aser iba sülen küm 15 atongtepa khen danga takok menguteti arur.