Missile amenokba agi Russia-Japan yimjung mapatong meraksatsütsü imlar: Peskov

Moscow, November 23 (Agencies): Russia-i Japan den mangatettep ken o benoka aliba Kuriles asetkong nung par tongpang nung amshitsü missile system amenokba ajanga par linük ana tsüngda mapang talangka benshia aruba mangatettepbaren nem tetsükdaktsü bener aruja, yimjung mapatong meraksatsütsü imlaba olen ka Kremlin otongdar, Dmitry Peskov-i tanü, Bodbar nü metetdaktsüogo.
Japan aser Russia nati küm 70 tejaklen nungi tenzüka, Pacific Ocean kübok densemba Kuriles asetkongtem den sentakba mangatettep ken o benshia arua lir aser item asetkongtem nung Russia-i par rong dak katetba Bastion aser Bal missile system amenokba osang jangjaogo.
Par mangatettep ken o benteta, par linük ana tsüngda teti atema yimjung nung alitsü atema jembiteptsü nükjidong nung Russia Tir, Vladimir Putin aser Japan Ato Kilonser, Shinzo Abe nati taruba December ita tsüngdong ajuruteptsü sentong renema lir.
“Nungdaka akümba aser temeten aliba ajanga Russia’er defense ministry-i Kuriles asetkongtem nung missile system-ji amenokogo,” ta Peskov-i ashi saka iba den sentakba osang tejangjabo pai memetetdaktsü.
“Ozü linük ana tsüngda mangatettep ken o bentettsü nükjidong nung ozü lenisang, Putin-i Japan semdangtsü sentong renema lir aser tan Kuriles asetkongtem nung missile system amenokba ajanga ozü linük ana tsüngda yimjung alitsü mapatong nem tetsükdaktsü bener marutsütsü tamang akar,” ta pai nenshia ashi.
Russia-i mangatettep adokba Kuriles asetkongtem nung par missile system amenokba osang angazükba sülen par sorkari iba den sentakba telangzüba agütsütsü atema tamasa shisadangtsü nungdakba olen ka Japan Foreign Minister, Fumio Kishida-ia metetdaktsüogo.
Russia-i tan amenokba Bastion missile system-ji tesem ka nungi tesem tanga kati bener senzütetba aser kilometer 300 shi pilar aliba rong tonga missile kadoktetba tongti tongpang oset lir.
Par linüki Bastion missile system-ji Ukraine linük nungi tashiyim agi agiba Crimea peninsula nunga amenokba osang angazükogo.
Bal anti-ship missile-jia Bation mesükba tongti missile system ka lir.
Russia-i Kuriles ta ajaba aser Japan-i Northern Territories ta ajaba asetkong den sentakba mangatettep ken o adoka benshiba ajanga tesüiba mapang, World War II (WWII) nungi tenzüka, par linük ana tsüngda tesendaktep junga meyangluteti arua lir.