Missile Technology Control Regime nung India züngsemogo

New Delhi, June 27 (Agencies): Hombarnü India linük Missile Technology Control Regime (MTCR) nung züngsemogo aser iba telok nung India züngsem 35buba asütsü.
Iba ya India-i tang mezüng multilateral export control regime ka nung adenba lir.
Foreign Secretary, S Jaishankar-i MTCR nung sign asü, iba sentong nung France Ambassador-designate, Alexandre Ziegler, Netherlands Ambassador, Alphonsus Stoelinga aser Luxembourg Charg d’Affaires, Laure Huberty nungera liasü.
External Affairs Ministry sangdong ka ajanga, “Tanep India MTCR nung denogo. Iba telok nung züngsem 35buba ama India adenba ajanga international non-proliferation nükjidongtem nung ajak ajangzüktsü,” ta metetdaktsü.
“India züngsem akümtsü atema pusemba asoshi India-i MTCR Partners 34 dang pelar. Onoki MTCR co-chairmen- Netherlands Ambassador, Pieter de Klerk aser Luxembourg nungi Robert Steinmetz na danga pelar,” ta sangdong nungsa shia lir.
France yimtiba, Paris nung MTCR Point of Contact-i India züngoktsü telemtetba agiba osangji New Delhi nung French Embassy aser Netherlands den Luxembourg Embassy tem ajanga metetdaktsü, ta sangdong nung shia lir.
India-i US den civil nuclear tezüngzüktep agiba mapang nungi tenzüka India-i NSG, MTCR, Australia Group aser Wassenaar Arrangement den adentsü meranger. Item telok ajanga nuclear, biological aser chemicals raraba osettem den technologies repranger.
2015 küm Italy-i India MTCR nung adentsü anema nokdak, kechiyong marines mangatettep onük nung parnoki India dang jashia liasü.
2012 küm Kerala tzüyimküm nung angopur ana tepsetba nung tai tonglokja alir Italy nunger marines anaprong chiokba sülen Italy-i India anema nokdakba nung atsüanema liasü.
MTCR nung züngsem akümba ajanga India-i missile technology tajungtiba alitettsü aser Russia den senteper inyakba jenjang tajungba akümtsü.
Tawa Seoul nung Plenary senden nung India-i Nuclear Suppliers Group (NSG) züngsem akumtsü benokba nung China-i nokdangba ajanga India nükjidong matalok. MTCR nung China dena mali.