Missiles aika yimzüka aruagi amaktsü : Donald Trump

Washington/Beirut, Rongchii 11 (Agencies) : Russia nungertem renema liang kechiaser US-i kaloktsüba missiles tasen aika yimzüka aruagi amaktsü, ta tanü Rasemnü US Tir, Donald Trump-i amokmerena metetdaktsüogo.
Mim aketba gas amshia amak ta temulung malem bilemba nung ajemdaker Syria anema apusotsü atema Trump-i Russia amokmerena iba osang metetdaktsü.
Syria Tir, Bashar Assad den zükloker inyakba atema paisa Moscow aija jembiogo.
US nungertemi Syria nung sorkar anemertem aliba tsütsüi missiles kar danga yokra item ajakji kazüka yoktsü aser missiles kong nungi yokdir idakjia amaktsü, ta yashi Russia-i amokmerenba osang sangdongba langzüa tanü Trump-i ibaji sangdongogo.
“Syria tsütsü kahloktsüba missiles ajak kazüka yoktsü atema Russia-i nangzüka lir. Anungji Russia nungertem renema liang kechiaser itemji (missiles) tasen aser tajungba aika yimzüka aruagi amaktsü,” ta Twitter nung Trump-i züluja lir.
“Gas amshia shiruru mapa inyakertem shirnoki pei nüburtem tepseta pelateper, parnok den nenok külemi masütsüla,” ta Moscow den alliance yanglur alisang Assad atishia jembidang Trump-isa shisemogo.
Ibaji langzüa, “smart missile-temji ozüng nung ajemdaker akümba sorkar tsütsüi masü saka kiralongrartem alidaki yoktsüla,” ta Russian Foreign Ministry-i Facebook nunga osang ka sangdongogo.