Mission 2019: Amit Shah aser Rahul Gandhi nati UP dak tenük yoker

Lucknow, Chiteni (July) 2 (Agencies): Taoba hopta Prime Minister Narendra Modi-i Uttar Pradesh nung election yimyim ayimoktsüba sülen BJP aser Congress tirtemi 2019 Lok Sabha elections atema nübortem aser party züngsemtem ajungmesotsü merangtsü.
Congress tir Rahul Gandhi-i Chiteni (July) 4 nungi anogo ananü par parliamentary constituency Amethi semdangtsü aser külen BJP tir Amit Shah-ia kasa anogotem Varanasi, Mirzapur o Agra semdangtsü sentong lir.
Taküm Monupii (May) nung government procurement centre ka nung Muslim nunger aluyimer ka asü aser Rahul-i asür kibong semdangtsü.
“Aluyimertem asüba ajanga state sorkari parnok atema mebilemtsüba sayur. Pai tsünütetba ayoktsü atema atadang pa asü. Rahul-i asür kibong semdangtsü aser par kinungertem den ajuruteptsü” ta Congress MLC Deepak Singh-i ashi.
BJP lennir shingaia asür kibong mesemdang ta Deepak-isa shisem.
Külen, BJP lennirtemi ashiba agi, Amit Shah-i Chiteni (July) 4 nü Kashi, Gorakhpur aser Awadh tesemtem nung Lok Sabha in-charges den senden amentsü.
Shah-isa social media workers’ meet nung o jembitsü. Iba sentong ya BJP IT cell ajanga ayongzüker aser mapa inyakertem nem shisalen sayutsü, ta BJP lennir kati ashi.
2014 küm BJP-i Uttar Pradesh nung Lok Sabha menden 80 nungi 73 nung takok ngua liasü.
Ajisüaka, taküm LS aser assembly by-election tem agidang Adityanath’er Gorakhpur Lok Sabha constituency aser Deputy CM Keshav Prasad Maurya’er Kaushambi constituency nung BJP-i tamakok angu.