‘Mission Modi’ mapa inyaker BJP züngsem 54-i Congress nung aden

Pashighat, April 10 (Agencies): Eastern Arunachal nung BJP atema khuret ka ajuruogo aser ibaji BJP züngsem 54-i party toktsür Congress nung adenba lir.
Parnok yagi East Siang, Siang, Upper Siang aser Lower Dibang Valley district tem nung ‘Mission Modi again Prime Minister’ (MMAPM) mapa nung shilem agia liasü saka Congress nung aden.
Congress nung adenertem rongnung East Siang district president Gumin Tayeng, Siang district president Yayam Taki, Upper Siang district president Atop Tayeng aser LDV district president Rajiv Lego nungertemi anir MMAPM ketdangpurtem dena lir.
April 3, 2019 nü Prime Minister Narenbdra Modi-i Pasighat semdanga BJP election rally ka nung aden.
East Siang nungi BJP züngsem 23, Siang nungi 10, Upper Siang nungi 6 aser Lower Dibang valley nungi 15-i Congress nung aden.
BJP tongti lennirtemi MMAPM campaign atema training agiba züngsemtem den amalitepa melii inyaksangshir ta Congress nung adenertemi ashi.
State aser district level BJP lennirtemi training agiba züngsemtem den tesentaktep mayur aser iba jagi nüboyimba mapa nung timtem ajurur, ta parnokisa ashi.
“State BJP president aser district level lennirtemi MMAPM campaign nung meyariteper. BJP lennirtemi onok khuret atema mebilemtsür aser iba jagi züngsemtem jashiteper” ta East Siang BJP spokesperson (MMAPM) Anar Tayeng-i ashi.
Ano külen, Pasighat West constituency nungi Block Congress lennirtemi ashiba agi BJP züngsem aika parnok den adener.
Taoba Anchal chairperson, ASM aser Gram chairpersons dena BJP züngsem aikati INC nung denogo, ta Congress lennirtemi metetdaktsü.