Missionaries of Charity teloki tanur ‘adopt’ masütsü

Kolkata, October 11 (Agencies): Mother Teresai tenzükba ‘Missionaries of Charity’ teloki joko pi chir bener arua adopt masütsü telemtetba agiogo aser iba telemtetbaji pu sema West Bengal Chief Minister Mamata Banerjee-ia metetdaktsüogo.
“Tanur adopt asüba sentong anentsü telemtetba agiba nungji onoki Missionaries of Charity aser Sister Prema pu asemer.” Parnok dak iba ama telemtetba agitsübaji temeten lir,” ta West Bengal chief minister Ms Banerjee-i metetdaktsü.
Tang center sorkari inyakyim tasen ka latetja lir, aser iba sülenji anidaktsü tasak asütsü, anungji pi chir adopt ser anepalua aliba inyakyim India nung taoba ita ana shi jakdang nungi anener ta Missionaries of Charity sangdong ka ajanga yashi Honibar nü metetdaktsü.
“Onoksasa adoption centres lapoker anepalua aliba mapatem anenadoker,” ta paisa ashi.
” Iba telemtetba ya inyakyim tasenba ‘Guidelines Governing Adoption of Children, 2015’ ministry of women & child development nungi nguli agia adok,” ta Missionaries of Charity-isa metetdaktsü.
Missionaries of Charity teloki center sorkari latetba inyakyim tasenba nung koba agi timatemar ajibo mashi, saka July ita nung latetba inyakyim tasenba nung tsürabur ka dang asür rogotemi online ajanga register asütsü lateta lir.
Missionaries of Charity teloki India nung tsürabur malir tanurtem anidena talidak, chiyongtsü, süoshi, mozü ajak agüja anepalur aser schooli yokba tesem 16 lir aser item rongnung tesem 13 bo sorkari tanurtem adopt ser ayutsü temelaba agüja lir.