Missionary 50

~  T. Tsükjem Jamir, Dimapur.

1974 küm NBCC ajanga Naga nungertemi alima kintem dangi missionary merijang ter (10,000) yoktsü Tsüngrem dang nangzük. Joko aji nangzüker küm 40 abensaogo. NBCC-i, ABAM aser tangar mungdangtemi yokba den asenok ABAM nung dena aliba arogo 150 ia missionary kwika yoka ali Tsüngremi par arogo tali moajangma. Saka shir arogoisa mission mapa inyaktsü nangzüker küm 40 abensadang, kecha inyaka mali asenoki asen tamakok Tsüngrem tang nangzükdi. Arogotemi missionary yokbaji Yisui nungloktsüba tongtipang mapa ka lir. Idaki missionary kati missionary 50 tamang agi atemzüker takok ngutetba sayatenya mapa ka inyaktetba asoshi Tsüngrem sentsüwangshitsü atema nübur den lemsateper. Tatalokba otzüji yamai lir. Küm (tenem) 50 shi süia ogo, Longsa Baptist Arogo nung tetsütem ishika tamang sarasadem ajanga 1965 nungi Revival tulu adok, iba Revival temoatsü ajanga Mr. S. Tsüknung, Pastor alidang, Longsa Baptist arogoi missionary arogo ka asütsü 1971 küm Tsüngrem dang nangzük. Iba mission wadang tenzüktsü asoshi Mission Board member shima file aser Register tasen lapoka, mission wadang asoshi sarasadem telok shima mission mapa inyaktsü tenzük. Mission mapa inyaktsü nükjidong nung Tsüngrem dang rongsen lenmang lapokjang ta teti sarasadema ayongzük. Iba mapa takok angutsü mechi mepu shia sarasadema, atar Deobar anogo ka nung tenla kidang alima kintem dangi missionary yoktsü atema pei tamang tenla saru. Iba anogo nung temeranger tenla sarutetbaji Rs. 14,804.20 p. liasü. Iba putu nung yimdaklir aluyimer sensakertemi iba ama mission wadang asoshi tenla tulu sarutetba ngua nüburtem ajaki süngmangtep. Iba senji kong amshitsü ta sarasadema alidang ABAM Centenary 1972 alidang Arunachal nung mission mapa inyaktsü lemtet. Iba mission mapa tenzükdang mezüngbuba missionary Rev. Longsanungsang, Longsa Baptist arogoi yaria yok.
Longsa Baptist arogo missionary arogo asütsü nangzüker küm 40 tsüngda Tsüngremer wadang balala inyaka aru. 2011 küm Longsa Baptist arogo 2016 küm Centenary amongtsü nükjidong nung küm 5 jeli terenemshiba sentong saya. Iba mapang adianu ka ajanga Longsa Baptist arogo Moria Mission Centenary matong tsüngda mission mapa karbo inyaker külen dang centenary benjong amongtsüla ta metetdaktsü. Iba tesayuba mapaji kanga tulu liasü, saka arogo centenary wadang tulu teinyaktsü aliba ajanga arogoi ano mapa talila ka inyaktsü temulung moulutet. Iba tesayuba mapaji Tsüngrem tenzüker adianu Mr. & Mrs. S. Tsüknung, Principal, S.B.C ashi, iba wadangji kechisüdirsüaka ni anir inyaktsü ta arogo dang nangzük. Anungji pai küm 5 tsüngda Longsa Baptist arogo Moria Mission Centenary ranglok sentong nung centenary matongtangsa alima tesem balalai missionary 50 yoka samaba tanüla 10,000 (merijang ter) anir arutsü Tsüngrem dang nangzük. Pai iba mapa takok angutsü nangzükba tamendakdak laiji nisung tsüngdang tamakoktsüji Tsüngremibo takoktsü ta Mtt. 19:26 nung shia aliba dak tamang yur tenzük. Pai missionary 50 yoktsü nükjidong nung Longsa arogo nung aser yimer bendanglen tesem balala nung alirtem sarasademer telok shimteta yutsü. Aser missionary 50 nüm ita sen agütsütsü atema pai Tsüngrem dak teimla tulu yur Mokokchung, Kohima, Dimapur towntem nung Bank Account ka ka lapoka yutsü. Iba wadang yabo tanüla tesayuba mapa asünung nisung shingaia memeteti pei sasa Bank-i orr pei akok tamang tenla agütsütsü osang metetdaktsü. Pai tamang agi Tsüngrem dang nangzükba ama küm 5 tsüngda nung missionary 50 yoktetogo. Item missionarytemji, Naga Burma, Arunachal, Bhutan, West Bengal, Assam aser Nagaland tesem balala nung yoka lir. Tsüngrem taoshi ajanga pa wadang asünung yimertemi aser bendanger tamanger tajungtemi tamang tenla November 2015 tashi nung sen 40 lakhs parnok ita sen agütsügo. Iba wadang ya centenary mong 2016 January nung tembangtsü. Ano, ita ana December & January anünga aliba nungji missionarytem ita sen Rs. 3,50,000 nüngdaker. Anungji amangba pur ajaki sarasadem nung yaridaktsüner. Ano centenary sülen mission mapaji pa maru tashi wadang balala nung akok tashi missionarytem yoktsü sarasadema atadagi.
Aji oda, tanü putu nung missionary kati, Tsüngrem dak tamang tulu yur missionary 50 yoktetbaji asenok arogotem asoshi tayongzükba tulu sayur. Taoba putu nung Missionary William Careyi ashiba ama, tanüa putu nunga asenoki “Kibuba tang tulu ka imlaa atemzükang (Expect) aser pa asoshi mapa tulu ka inyakang” (attempt). Adianutem tanü shir arogoi Pai nungloktsüba mission mapa nung temulung agüja inyakdir Tsüngremi par arogoji Antiok arogo nung ama tamang tir aika adokdaktsütsü aser par arogoji Antiok arogo ama missionary arogo ka akümtsü.