MISSIONARY OLA

~  Rev  I. Lanu  Jamir 

Iba osang azünger ajak dangi Kibuba Yisu temeim salem abener. Tsüngrem taochi agi ni Theological College balala nung (B.TH, BD, M.TH) zünga senzür March 23,1986 anogo nung Asangma Baptist Arogo nung ABAM nungi Rev A.Temjen aser NMM nungi Rev T. Alemeren parnok arua commission asü. Iba sülen Chikaldara, Maharashtra-i missionary training ao (missionary training is a must for missionary service).Training nung alidang kong inyaktsü ta sarasadema alidang Tsüngremi Orissa nung inyaktsü mangdang (Vision) agütsü.

February 17,1987 Asangma Arogo nung kibong aküm.Iba sülen NMM Office nung ita ishika inyaka lir Baripada, Orissa kong asür Graham Staines kibong (Australian Mission) inyaka liasü yangji oa anenzük. Parnok teyari ajanga June 27,1987 Keonjhar, Orissa tonga yangji NMM-i Mission Field lapok. Oshi angazüka aser survey agia HO kin den Kibubar mapa inyaktsü tenzükba November 21,1988 nung nisung 5 (five) temulung meyipa amanga tzüsentsü. Küm 14 (1987-2000) tsüngda nung Tsüngrem taochi aser asenok sarasadem ajanga Arogo 4 aser Fellowship 3 ta küma Kibubar mapa kibongi inyak. Iba field nung June 26-27, 2012 küm Silver Jubilee mungogo.Tang tashi nung Arogo 15 aser Fellowship 20 tashi yangertetogo.

Küm 14 Orissa nung Tsüngrem mapa inyaka arudang timtem tokrong aika ajangshia aruogo. Tangar sobaliba ka nung inyaktsüji temela masü. Ajemalu,taremzük, tangatet aser pei metetba ajak amadoker inyaktsüla. Paul-i ashi,”Tashi maitbatem ajangzüktsü ni tashi maitbatem madang tashi maitba ama aküm. Kar kümzüktsü ni kechisarena agi ajak madang ajak aküm” (1Kor.9:22). Yamaji par nisung kümer inyak. Ano Yisui ashi,”anungji nenok per ama shisa kaang, aser posu ama tongmelang liang” (Mathi 10:16). Yisui ashibaji mapa küma inyaktsü mapang ajuru. Tsükchir (RSS) alidak alir asünung kodang yimtsüngtemi odir anepdang yakta 4:00 am nung aotsü aser yimtsüng sema senzür yakta arutsü. Ano aonung yipa aotsüsa süra tsükchiri mangudang 7:00 pm nung aotsü, mapa temer anepdang yakta meyipa arutsü ta tsükchir nungi jenshia timtema inyak.

Mamalapusi tasür yimtsüng ka nungi kibong 6 amanga ministry yangji tenzük. Tia makai April 19,1989 küm anepdang yakta RSS nisung 40 shi iba yimtsüngi oa tamangertemji merenshia an (hen) ka tepseter iba azüji rükshi (springle) aser tanü nungi iba temaitsü ajanga nenok Hindu akümer ta nangzükdaktsü. Iba anogo nungi kü den Evangelist 2 anir tatalokbaji memeteti iba yimtsüng jagi oshia ata. Tsüngrem taochi agi onok iba lendong nungi kümzüka meyipa arutet. Item tatalokba dak alaka tasütsü nungi Tsüngremi kümzükba kuli lir. Ano Orissa nung  tamanger asoshi mapang tamajung ka aru. January 22,1999 anogo nung Graham Staines aser par japaso 2 RSS aser Bajrang teloki gari nung mi agi rongseta südaktsü. Iba lendong ajanga tamangertem timtem aika ajuru. Onok town tila ka nung alir aser hopta ana shi anüngdanga ki shir kazütsüsa aküm. Timtema inyakaka, tenzükba mapa nung tepelaji-nüktzü yima aser asentzü sena Kibubar wadang nung inyakba süngjang tanga limapurtem Khristan akümba angudang ken mejemeri Ao Ken 286 nung- “Anu lur tzüyim külenji, nai sayuba nisung kar ngurabang koda pelatsü” ibaji nüklai arua pelaseter.

Temeim adianutem,Tsüngrem dang asenoki missionary meyirjang ter (ten thousand) yoktsü tezüngzüktepba agiba rongnungji ajaki onüaka motetsü. Saka ken mejemeri Ao Ken 274 nung,”Nisung ajaki inyaktetsüsa mapa lir”. Na motetaka nai Tsüngremi moatsüba nungi tajungtiba agütsütsü akok, Mesura anogo nung kenbosa  missionarytem atema sarasademtsütsü akok. Missionary aika asenoki sarasademtsüba agi tsükchir nungi kümzükba kuli tejangja lir. Ano nai Tsüngremi moatsüba nungi agütsütsü nungi mangateti aliba, sarasademtsütsü khuret mangateti aliba, item dang oa angateta shia senzüra (mobilize) Tsüngrem kanga pelatsü aser iba temoatsüji nai agitsü… AMEN